Dock of the Bay jaialdiaren egitaraua osatuko duten jarduerak aurkeztu dituzte
Aitor Etxebarria eta Hannot Mintegia musikariak. 
Ekainaren 7tik 13ra egingo dute 14. Dock of the Bay musika dokumentalen jaialdia. Film labur eta luzeak Antzoki Zaharrean eta Trueba zinema aretoetan proiektatuko dituzte. Egitaraua osatuko duten jarduera paraleloak ere izango ditu, eta horien berri eman dute.
Dock Live! saila da horietako bat. Musikaren, ikus-entzunezkoen eta arte eszenikoen inguruan lan egiten duten artisten eta hizkuntzen arteko bidegurutze bat da. Bi saio berezi izango ditu aurten, ekainaren 10ean eta 11n, Tabakalerako Kutxa Kultur aretoan. Ekainaren 10ean, 19:00etan Richard Mascherin dantzariaren Caer, caer, caer dantza performancea eta proiekzioa emango dute. Ekainaren 11n, berriz, 19:30ean, Desde la Aleatoriedad ikuskizuna egingo dute Aitor Etxebarriak eta Hannot Mintegiak.
Horrez gain, zuzeneko hainbat irratsaio egingo dituzte. Niño de Elche musikariak El disco de tu vida programa aurkeztuko du Asier Leoz eta Juan Luis Etxeberriaren eskutik ekainaren 11n , Kutxa Kultur Plazan. Ekainaren 12an, aldiz, zuzenean emango da Docs&Talks irratsaioa, Ines Calero eta Laura Garciarekin. Bestalde, Carántula podcasta grabatuko dute Jabier Rodriguez, Fran Fraca eta Iñigo Basurkok, soinu-saio grafiko berezia; musikaz eta azalen diseinuaz hitz egingo dute. Gainera, Nuevos Públicos sailean, podcasta egingo dute Deustu Irratiko ikasleek, eta maiatzaren 13an eta 14an Europa en 8 Bits proiektatuko da Trueba zinema aretoetan.
Jaialdiak irauten duen egunetan, Kutxa Kultur Plazaren video-wall-ean, egunero proiektatuko dira Musikeneren bideomusika lanak, 12:00etan, 13:00etan eta 20:00etan, The Body, the Gesture izenburupean.
Kolaborazio berriak
Dock of the Bay jaialdiak kolaborazio berriak izango ditu aurten. Gehitu eta Mugen Gainetik elkarteek jaialdiarekin bat egin dute, musika eta zinemaren bitartez sentsibilizatzeko eta gay, lesbiana, bisexual eta transexualen oinarrizko eskubideak erabat aitortzeko, bai Euskal Herrikoak bai Erdialdeko Amerikakoak. Horren haritik, Waiting for B eta Samantha Hudson filmak proiektatuko dira ekainaren 9an eta 11n, hurrenez hurren, 19:00etan, Dabadaban. Hain zuzen ere, Egiako aretoa izango da jaialdiko beste espazio bat. Bi proiekzio horiez gain, brunch saio bat egingo dute DJ baten laguntzarekin, eta Las Penas boskoteak disko berria aurkeztuko du zuzenean.
