Igeldoko Kultur Mahaia sortu dute hainbat herritarrek
Udaberriko dantza saioa, Igeldoko frontoian. (Argazkia: Igeldo.eus) 
Urte osoan zehar kultur jarduera desberdinak antolatzeko helburuarekin, Igeldoko Kultur Mahaia sortu dute hainbat herritarrek. Urtean zehar ekintza zehatzak antolatu izan diren arren (udaberri eta udazken jaiak, herriko festak, euskararen eguna…), kultur ekintzak antolatzeko beharra dagoela ikusi dute. Horretarako, kultur ekimenak antolatzen dituzten herriko talde zehatzekin ere lotura izango dute, ekimen guztiak behar bezala koordinatzeko.
San Isidro egunaren inguruan antolatu zituzten lehen kultur ekintzak, hilaren 15eko eta 16ko asteburuan. Udaberria girotzeko asmoz, ondorengo jarduerak egin zituzten: patin roller saioa, argazki erakusketa, dokumental emanaldia eta euskal dantza ikuskizuna. Aurrera begira, beste hainbat ekintza antolatzeko asmoa dute. Hala nola, zinema plazan, astronomia saioa, ikuskizunak eta antzezlanak.
Herrian kultur jarduerak antolatzeko gogoz dauden bederatzi herritar elkartu dira talde honetan, baina adierazi dute taldea irekia dela eta interesa duenak gerturatzeko aukera duela. Horretarako, Herri Kontseiluarekin harremanetan jarri besterik ez dago: herrikontseilua@igeldo.eus.
