
Emakumezkoen Ohorezko Mailako liga zortzigarren aldiz irabazi du Bera Bera eskubaloi taldeak; hirugarrena jarraian. Maiatzaren 8an Xixon mendean hartuta ziurtatu zuten titulua, eta maiatzaren 20an ospatu zuten zaleen aurrean, Gasca kiroldegian. Lorturikoa garrantzitsua dela dio Alba Menendez jokalari zarauztarrak, eta dagoeneko datorren denboraldiari begira jarri direla aitortu du.

Bi urtez ezin izan dute antolatu, baina aurten ez dute hutsik egingo. Ekainaren 11n egingo dute VII. AB Krosa, auzoko euskararen aldeko festa eguna. Amara Berriko Berritsu euskara elkarteak antolatzen du, eta beste behin ere Irutxuloko Hitzak babestuko du.

Antiguako Doka aretoak hamabost urte bete berri ditu, eta maiatzeko eta ekaineko programazioarekin ari dira ospatzen. Pandemiaren bi urte gogorren ostean heldu da urteurrena, eta oso garai gogorra izan bada ere, pozik agertu da Mikel Roman arduraduna, egoerari buelta ematen ari direlako.