Loiolako eta Aieteko hainbat gunetan TAO sistema jarriko du udalak 2023tik aurrera
Aieteko Lazkano kalean TAO sistema ezarriko dute (Argazkia: Nora Goialde Agirre) 
TAO sistema arautua 2023ko urtarrilaren 1ean iritsiko da Loiolara eta Aieteko hainbat gunetara, eta ez aurten, aurreikusita zegoen bezala. Gaurko Gobernu Batzordeak ontzat eman du aparkalekua arautzen duen ordenantzaren bosgarren aldaketa. Aldaketa horren bidez, araudian sartu dira aipatutako eremu berriak, ordainpeko aparkalekua ezartzea eskatu baitute bertako bizilagunek.
Udal Gobernuak ere argi berdea eman dio tarifak % 1,5 igotzeko proposamenari, baina igoera hori berriro aztertu beharko da ordenantza fiskalen esparruan.
Orain arte, Donostian 15.000 aparkaleku daude araututa kaleetan, 2018an Egiako 2.200 plaza gehiago sartu ondoren. Hori izan zen sistemari gehitu zitzaion azken auzoa, bizilagunen erreklamazioen ondoren. Udalak ikerketa bat egin zuen eta Egiako kaleetan aparkatzen zutenen % 68 auzotik kanpokoak zirela egiaztatu zuen.
Loiolaren eta Aieteko Jauregiaren inguruan ere hainbat herritarrek eskatu diote Udalari TAO ezartzea, gero eta kanpoko auto gehiago daudelako.
Tao eremu berriak
Loiolako Hipikako bidea, Aloña kalea, Aralarko mendilerroa, Haritzetako gaina, Batxilardegi, Eliza kalea, Hernio mendia, Igeltegi, Latsarien plaza, Loiolako zeharbidea, Igeltegi, Matxiñene, Plazaburu, Urbasa, Urbia, Zubiondo, Zuzenene. Aieteko Jauregiaren ingurua, Melodi, Jose Olaizola eta Alkiza plaza, Heriz-Aizkorri, Sanserreka, Manuel Vazquez Montalban eta Aizkorriko tarteak eta San Bartolome gaina. Gune gorri bakarra izango da Aralar Mendia kalean, eta ordu eta erdiko gehieneko denbora izango du.
