Kopa irabazita, ligaren bila abiatuko da Bera Bera
Donostiako eskubaloi taldeak titulurako final-laurdenetako joanekoa jokatuko du Xixonen.
(Argazkia: Bera Bera) 
Denboraldia borobildu nahi du Bera Berak. Ligako fase erregularra lehen postuan bukatu ondoren, Espainiako zazpigarren kopa irabazi zuten Malagan, pasa den asteburuan. Orain, liga ere eskuratzeko kanporaketari ekingo diote. Xixonen kontra jokatuko dute final-laurdenetan, eta gaur dute joaneko partida, 21:00etan. Aldiz, maiatzaren 6an izango da itzulerakoa, Gaska kiroldegian. Irabazleak Porriñoren eta Elxen arteko kanporaketako garailearen kontra jokatuko du finalerdietan. Eta finalerdia hiru partidara jokatuko da maiatzaren 13an, 19an eta, beharrezkoa balitz, 21ean. Valladolid-Malaga eta Atletico Guardes-Rocasa Kanaria Handia dira beste bi kanporaketak.
Futbolean, Realak Osasunaren aurkako euskal derbia jokatuko du gaur, 21:00etan, Sadar futbol zelaian. Txuri-urdinek joko mailarik onena erakutsi beharko dute gorritxoak mendean hartzeko. Kopako finalerako sailkatu ondoren, Europako postuetatik gertu daude nafarrak, eta ez dute aukera galduko puntu gehiago batzeko. Realarentzat, berriz, neurketa oso garrantzitsua da. Irabaziz gero sailkapeneko laugarren postua –eta Txapeldunen Ligako txartela– egonkortzeko beste pauso bat emango lukete.
Emakumezkoen taldeak, berriz, Vila-realen zelaian jokatuko du etzi (12:00). Etxeko lanak ondo baino hobeto beteta –Valentziari 4-0 irabazi zioten–, beste garaipen bat eskuratzeko aukera dute. Ate aurrean berdintsu asmatzen badute, seguru hiru puntuak Donostiara ekarriko dituztela.
Belar hockeyan, Realak Club de Campo arerio zaila izango du bihar zain (15:00). Madrildarrak sailkapeneko hirugarren postuan daude, eta sendo dabiltza etxean. Horrela ere, txuri-urdinek aukerak ditu beste garaipen garrantzitsu bat lortzeko.
PARTIDAK
Eskubaloia
Ligako kanporaketa, final-laurdenak (joanekoa)
- Xixon – Bera Bera (gaur, 21:00)
Futbola
Gizonezkoen liga, 32. jardunaldia
- Osasuna – Reala (gaur, 21:00)
Emakumezkoen liga, 27. jardunaldia
- Vila-real – Reala (etzi, 12:00)
Belar hockeya
Emakumezkoen ohorezko maila, 17. jardunaldia
- Reala – Club de Campo (bihar, 15:00)
