Donostian «Voxeko faxisten kontra» mobilizatzera deitu dute
Ertzaintzaren presentzia handia zegoen Vox alderdi ultraeskuindarraren egoitzaren inaugurazioan. Beñat Parra 
EAEko hauteskundeak direla eta, Vox alderdi ultraeskuindarrak ekitaldia antolatu du bihar Alderdi Ederren. Mugimendu ezberdinetako herritarrek deialdi bateratua egin dute ‘Faxismoaren gorakada gelditu’ lelopean, 18:00etan Cervantes Plazara bertaratzera deitu dute, “faxistei aurre egiteko”.
Hedabide honi igorri dioten prentsa oharrean, deitzaileek adierazi dute “alderdi faxista horri aukera ematen zaiola ideia erreakzionario eta zapaltzaileak nahieran zabaldu ditzan”.
Ideologia faxistak “eskubide politikoen aurkako defentsa irmoa” egiten dutela salatu dute, eta “kolektibo zapalduenen” aurkako proposamen politiko esplizitua dutela, “LGTB kolektiboko jendearentzat, migranteentzat eta gazte langileentzat arrisku erreala dira”.
Deitzaileek gaineratu dutenez, instituzioetatik ezin zaio aurre egin faxismoaren gorakadari, eta herritar oro deitu dute lan horretara: “Faxismoaren forma orori aurre egitea urgentziazko lana da, bere jarduna eta ideologia ez daitezen gizartean normalizatu”.
