«Bigarren kopa etxera ekartzeko aukera gertuago ikusten dugu»
Realak eta Bartzelonak Espainiako Kopako finala jokatuko dute bihar, Zaragozako Romareda futbol zelaian (19:00). Txuri-urdinak 2019ko balentria errepikatzen saiatuko dira Kataluniako talde ahalguztidunaren kontra. Cecilia Marcos (Donostia, 2001), Nahia Aparicio (Tolosa, 2004) eta Izarne Sarasola (Ibarra, 2002) jokalariek argi dute Realak zer behar duen ezustekoa emateko.
Finalaren atarian, nolakoa da taldearen eta jokalarien konfiantza?
Cecilia Marcos (C.M.): Konfiantza osoz gaude. Jakin badakigu zaila izango dela Bartzelonaren kontrako finala. Talde bikaina dute, eta garaiezina dirudien arren, guk gure aukerak izango ditugula uste dugu.
Nahia Aparicio (N.A.): Taldea prest dago final esanguratsu honi aurre egiteko. Ez da urtero bizi dezakeguna, eta eguna iristea desio dugu gure bertsiorik onena emateko.
Izarne Sarasola (I.S.): Ligako emaitzek ez dute asko laguntzen konfiantza lortzeko. Helburua argi daukagu, eta hori kopako finala da. Gogotsu eta motibatuta gaude. Aldagelan nabaritzen da giroa ona dela. Egun desberdina izango da.
Eta zuen konfiantza?
C.M.: Taldearen antzera, konfiantza handia daukat. Dena dela, aitortu behar dut nahiko urduri nagoela. Denboraldia bukatzen ari da, eta behar bezala bukatzeko, kopa irabazi nahiko nuke. Modu batera edo bestera, esperientzia oso polita izango dela uste dut.
N.A.: Egia esan, konfiantzarekin nago. Denok dakigu Bartzelona egokitu ahal zitzaigun arerio zailena dela, baina partida bakarrean gauza asko gerta daitezke. Egun txar bat izan dezakete, eta guk, berriz, oso ona. Ez diegu ezer erraztuko, eta haiei ezustekoa ematea gustatuko litzaidake.
I.S.: Finalean minutu batzuk izatea gustatuko litzaidake. Nahi horrekin begiratzen diot finalari. Ondo ari naiz entrenatzen, maila ona ari naiz ematen, baina gutxi jokatu dut azken partidetan. Dakidana ondo egiten jarraitu nahi dut, eta entrenatzaileak jokatzeko aukera ematen badit, nire aldetik dagoen guztia emateko prest nago.
«Aitortu behar dut nahiko urduri nagoela. Denboraldia bukatzen ari da, eta behar bezala bukatzeko, kopa irabazi nahiko nuke»
Cecilia Marcos, Realeko jokalaria
Finalak irabazteko jokatu behar direla diote. Ordea, Bartzelona aurrez aurre ikusita, nola lor daiteke hori?
C.M.: Esan moduan, zaila izango da, eta hori erabat barneratuta dugu. Finalak irabazteko jokatu behar diren modu berean, arerioak baino gol bat gehiago sartu behar da irabazteko. Futbolean maiz errepikatzen diren esaldiak dira, baina hori bezain sinplea da finalean gailentzeko behar duguna. Adi eta sendo ibili beharko gara oso erraz egiten dutelako gola. Asmatzen ez badute, guk aukerak izango ditugu finala irabazteko.
N.A.: Kontziente gara sufrituko dugula. Hori jakinda, defentsan sendo egon behar dugu, komunikazio askorekin gure artean. Erasoan, berriz, sortzen ditugun aukerak ondo baliatu beharko ditugu saria lortzeko.
I.S.: Gehienbat, psikologikoki prestatu gara finalerako. Irabazi dezakegula sinetsi behar dugu, helburua lortzeko lagungarria izango delako. Aurkariari ez gara asko begiratzen ari, badakigu zein den. Partida bakarrera edozer gerta daiteke, eta hori ondo erakutsi genuen 2019ko finalean Atletico Madrilen kontra. Garai hartan, Atletico Madril eta Bartzelona maila berean zebiltzan. Beraiek ziren irabazteko hautagaiak, eta ezustekoa emanda, kopa altxatu genuen.
Zeintzuk izan daitezke gakoak Bartzelona mendean hartzeko?
C.M.: Presioa ondo egiten duen taldea gara, eta beraiei baloia kentzea izango da gakoetako bat. Horrez gain, atzeko lerroan partida perfektua jokatu beharko dugu, Bartzelonari aukera bakar bat ere ez emateko.
N.A.: Bartzelonak jokatu dituen partidak banan-banan eta pixkanaka aztertzea garrantzitsua izan da. Oso onak dira, baina ahuleziak ere badituzte, eta horietan sakondu behar dugu emaitza on bat lortzeko. Esaterako, bertikalak izan behar gara, eta baloia galdu orduko, presioarekin asmatu behar dugu.
I.S.: Egiari zor, zorte pixka bat izateak asko lagunduko liguke. Era berean, beraiek egun txar bat izatea nahi genuke, erasoan asmatu ez dezaten. Minutuek aurrera egin ahala, golik jasotzen ez badugu, gure aukerak izango ditugu ezustekoa emateko.
«Erakutsi dugu ustez gu baino hobeak diren taldeen aurka lehiakorrak garela. Finalean hori bera da lortu nahi duguna»
Nahia Aparicio, Realeko jokalaria
Beraz, posible da bigarren kopa etxera ekartzea?
C.M.: Bai, posible da. Asteak daramagu finala taktikoki lantzen, eta bigarren kopa etxera ekartzeko aukera gertuago ikusten dugu.
N.A.: Kopan ez ginen faboritoak Levanteren eta Atletico Madrilen aurka, eta biak kanporatu genituen. Erakutsi dugu ustez gu baino hobeak diren taldeen aurka lehiakorrak garela. Hau da, partida txukunak eginez, emaitza onak lor ditzakegu. Finalean hori bera da lortu nahi duguna.
I.S.: Bai, noski, hori da sinetsi behar duguna. Txapeldunen Ligan neurketa bat galdu dute, eta horrek erakusten du Bartzelona ahalguztidunak ere huts egin dezakeela.
Zer izango litzateke zuentzat kopa irabaztea?
C.M.: Ikaragarria izango litzateke. Niretzat bainoago, taldearentzat. Urte zaila ari da izaten, eta talde honek titulu hau merezi du.
N.A.: Ametsa errealitate bihurtzea. Hurrengo egunera arte ez nuke sinetsiko kopa irabazi dugula. Egia esan, eromen hutsa litzateke niretzat, asko desio dudan zerbait.
I.S.: Txikitako ametsetako bat da Realarekin titulu bat irabaztea. Hain gazte hau bizitzea oso berezia izango da niretzako, eta irabaziko bagenu, are bereziagoa izango litzateke. Ahaztezina, alegia.
Denboraldia ez da erraza izaten ari ligan, garaipenak lortzea garesti dagoelako. Zer da falta zaizuena?
C.M.: Gola da falta izan zaiguna. Ondo jokatu dugu partida gehienetan, baina ez dugu lortu hori markagailuan islatzea.
N.A.: Azken partidetan beste talde izaera bat erakutsi dugu, askoz ere hobea. Aukera asko sortu ditugu, baina ez dugu ate aurrean asmatu. Aldiz, arerioek abagune gutxiagorekin golak egin dizkigute. Zubietako lan ona ez dugu lortu neurketetan islatzea, eta ondorioz, ez ditugu emaitza onak izan. Kopan izan garen taldea ligan izan bagina sasoi osoan zehar, sailkapenean gorago egongo ginateke. Denboraldia ez genuen ondo hasi, gero bolada on bat izan genuen, eta liga bukaeran ez dugu nahi genuen maila ematerik izan.
I.S.: Entrenamendu onak egiten ari gara, baina partidatan ez dugu lortzen atzean eta aurrean asmatzea. Defentsa lanean ez gabiltza fin, eta gol asko jaso ditugu. Erasoan, berriz, aukera asko sortu, baina kostata ari gara golak egiten, salbuespenekin. Hain zuzen ere, lantzen ari garena hori da, bi areatan eraginkorrak izatea.
«Gehienbat, psikologikoki prestatu gara finalerako. Irabazi dezakegula sinetsi behar dugu, helburua lortzeko lagungarria izango delako»
Izarne Sarasola, Realeko jokalaria
Pertsonalki, egindako denboraldiarekin gustura zaudete?
C.M.: Egia esan, kostatu zait minutuak izatea sasoi honetan, lehiakide oso indartsuak ditudalako aurrealde horretan. Halere, gustura nago taldeari emandakoarekin, eta denboraldia ahalik eta ondoen bukatzea gustatuko litzaidake.
N.A.: Nahiko ona da nire balorazioa. Pasa den urtean hiru koxka beherago aritu nintzen jokatzen, eta jauzi nabarmena izan da niretzako. Uste nuen ez nuela asko jokatuko, baina ez da horrela izan. Natalia Arroyo entrenatzaileak konfiantza eman dit, eta asko jokatzen ari naiz. Hamaikakoan sartu nintzenetik, asko gozatzen ari naiz. Hori da garrantzitsuena.
I.S.: Oso pozik nago. Hasieran, gehiago jokatzen nuen, baina nire postuan lehiakide gogor bat daukat minutuak lortzeko. Batak besteari mesede egin diogu, jokalari hobeak garelako, baina une honetan gutxiago jokatzen ari naiz. Horrela ere, entrenatzaileak ematen dizkidan aukerak ondo baino hobeto aprobetxatuko ditut.