Hirutik hiru titulu
Donostiako Bera Bera eskubaloi taldeak historia egiten jarraitzen du. Jokaturiko final guztiak irabazi dituzte. Liga, kopa eta superkopa eskuratuta, denboraldi borobila osatu dute. Laugarren aldia da hiru tituluak sasoi berean irabazten dituztela, eta hori talde oso gutxik lortu dute. Dagoeneko datorren denboraldia prestatzen hasi dira.
Irabaztera ohitu dira Bera Berako neskak. Azken urteotan, oroigarriak binaka eta hirunaka zenbatu dituzte, palmares esanguratsua osatzeraino. Guztira, 26 titulu eskuratu ditu eskubaloi taldeak: bederatzi liga, zortzi kopa eta bederatzi superkopa. Ohorezko Mailan ez dago horrenbeste lorpen dituen besterik, eta Donostian ezta ere. Beraz, edozein aitortza motz geratzen da Bera Berak urte gutxian idatzitako historia nabarmentzeko. Horrela ere, Donostiako Udalak ez du aukera galdu nahi izan, eta asteartean txapeldunei harrera egin zien udal batzar aretoan. Bera Berako sei jokalarik, entrenatzaileak eta hainbat teknikarik parte hartu zuten. Hain zuzen ere, hedabide honek harreran izan ziren hiru jokalarirekin hitz egiteko aukera izan du: Alba Menendez (Zarautz, 1991), Anne Erauskin (Ermua, 1998) eta Maddi Aalla (Gorliz, 1997).
Bera Beraren denboraldia ez da erregularra izan, hiruek aitortu dutenez, baina une erabakigarrienetan onenak izan direla diote. «Urtetik urtera zailagoa da titulu bat irabaztea, eta aurten jokoan genituen hiruak eskuratu ditugu. Denboraldi bikaina eta borobila izan da», dio Mendendez kapitainak. Aalla iritzi berekoa bada ere, ñabardura bat egin du: «Nire ustez, denboraldi ia perfektua izan da. Europara sailkatu izan bagina, orduan bai. Halere, irabazi ahal genuen guztia irabazi dugu, eta horrela bukatzea denboraldia, ezin da gehiago eskatu». Antzera pentsatzen du Erauskinek ere: «Finkaturiko helburu guztiak, Europarena izan ezik, bete ditugu. Denboraldi borobila egin dugu, eta oso pozik hartuko ditugu oporrak».
Bederatzi liga irabaztea historikoa da, batez ere, urte gutxian eskuratu dituelako Bera Berak. «Uste dut ez garela kontziente. Jokatzen dugu, gozatzen dugu, dena nahi dugu irabazi… baina ez ditugu buruan eskuratutako titulu guztiak. Bederatzi liga irabazi ditugu urte gutxian, oso esanguratsua da hori. Bera Beraren urrezko aroa bizitzen ari garela uste dut. Guk zortea dugu hemen gaudelako. Honek jarraitzen duen bitartean, gozatzen segituko dugu», azaldu du Menendezek. Aldiz, harro sentitu da Aalla: «Bederatzigarren ligaren irabazle izatea ohore bat da guretzat, klubaren palmaresean gure izena agertuko delako». Dagoeneko hamargarrena irabazteko gogotsu daudela gaineratu du Erauskinek.
26 tituluetatik 23 ditu
Bera Berako jokalari beteranoenetakoa da Menendez, eta, horregatik, taldearen lorpen gehienetan parte hartu du. «Nire palmaresean Bera Beraren 26 tituluetatik 23 ditudala esan didate. Horretaz ere ez naiz kontziente izan orain arte, baina erretiratzen naizenean erreparatuko diet zenbakiei. Esan moduan, eskubaloi taldearen garai onenean gaude, eta zorionekoa naiz parte naizelako. Noski, momentua aprobetxatu eta titulu gehiago eskuratu nahiko nituzke Bera Berarekin», esan du kapitainak.
«Urtetik urtera zailagoa da titulu bat irabaztea, eta aurten jokoan genituen hiruak eskuratu ditugu»
Alba Menendez, Bera Berako kapitaina
Denbora gutxiago daramate Donostian Erauskin eta Aalla bizkaitarrek. Ondorioz, beraien palmaresa laburragoa da, baina ez arrunta. «Nire seigarren titulua da. Duela hiru urte etorri nintzen Bera Berara, eta, beraz, liga erregular bat eta aurtengoa, bi kopa eta bi superkopa ditut», dio Aallak. «Nire lehenengo liga da. Pasa den sasoitik nago Bera Beran. Beraz, bost titulu eskuratu ditut taldearekin: iaz bi, eta aurten hiru», adierazi du Erauskinek.
Titulu guztiak dira bereziak, eta aurten hiru eskuratu ditu Bera Berak. Ordea, Illunben irabazitako kopa litzateke bereziena, zaleen aurrean jokatu eta garaipena ospatu zutelako. Horren inguruan galdetuta, Menendezek argi dauka: «Aurtengo titulu bereziena kopakoa da, zalantzarik gabe. Etxean jokatu eta irabazi izanak berezitasun puntu hori eman dio. Besteak ere garrantzitsuak eta politak izan dira, baina Illunbekoa oso berezia izan zen guztiontzat».
Erauskin eta Aalla ados daude kapitainarekin, baina ligako titulua irabazi izana garrantzitsuagoa iruditzen zaie. «Egia esan, Illunbekoa oso berezia izan zen, asteburu bikaina izan zelako. Azken batean, kopa etxean irabaztea ikaragarria da. Dena dela, niretzat bereziena ligako titulua da. Iaz ez genuen lortu, eta arantza horrekin geratu nintzen. Horrela ere, hiru tituluak irabaztea oso berezia izan da taldearentzat», nabarmendu du Erauskinek. Iritzi berekoa da Aalla: «Denak dira bereziak. Illunben kopa 4.000 zaleren baino gehiagoren aurrean irabaztea ahaztezina izan zen. Oso polita, benetan. Betirako gogoratuko dut. Halere, Annek esan moduan, ligako titulua izan da bereziena. Iaz irabazi ez genuenez, bagenuen berriz ere lortzeko gogoa. Gainera, finala oso lehiatua izan da. Bigarren partidan Elxek eskura izan zuen liga, baina markagailua berdintzea lortu genuen».
Onenak, ez erregularrenak
Partida asko jokatu behar izan dituzte hiru tituluak irabazteko. Batez ere, ligan eta kopan. Iazko irailean abiatu zen emakumezkoen Ohorezko Mailako liga, eta aurtengo martxoan bukatu zen fase erregularra. Aldiz, ekainaren 1ean erabaki zen ligako titulua Elxen, kanporaketako finalaren bigarren partidarekin. Elxek eta Bera Berak berdindu egin zuten (27-27), eta horri esker altxatu zuten kopa donostiarrek. Gogoratu behar da Donostian jokaturiko lehen partida Bera Berak irabazi zuela (30-26). Lau goleko errenta horri esker eskuratu zuten titulua. Irabazi arren, Menendezek, Erauskinek eta Aallak diote ez direla erregularrenak izan, onenak baizik.
«Niretzat bereziena ligako titulua da. Iaz ez genuen lortu, eta arantza horrekin geratu nintzen»
Anne Erauskin Bera Berako jokalaria
«Ez gara erregularrenak izan, eta liga irabazi dugu. Egia da sasoi bukaerara oso sendo iritsi garela. Bai fisikoki eta baita mentalki ere. Partida asko izan dira, eta momentu txar batzuk ere izan ditugu. Neurketa txarrak jokatu genituen iazko urte bukaeran. Azken unean galdutako puntu asko izan ziren. Horrela ere, egoerari buelta ematea lortu genuen», adierazi du Menendezek. «Ez gara ligako talde erregularrena izan, baina sasoi bukaerara iaz baino askoz hobeto iritsi gara», gaineratu du Aallak. Denboraldiak aurrera egin ahala taldeak izandako «bilakaera paregabea» nabarmendu du Erauskinek: «Ez ginen ondo hasi, superkopa irabazi arren. Horrela ere, joko aldetik sentsazioa ez zen ona izan urtarrileko eta otsaileko partidetan. Hori bai, guztiok argi dugu horrelako denboraldi bat sinatuko genukeela, izan duen bukaerarekin».
Ligako titulua erabakitzeko formatu aldaketak kalte egin zion Bera Berari pasa den sasoian. Aurten, berriz, mesede ederra egin dio. «Horrela ere, maiz adierazi dut ez naizela ligako formatuaren zalea. Jokalariontzat partida gehiago dira, eta fisikoki gogorragoa da guretzat. Halere, klubarentzat eta publikoarentzat erakargarriagoa da. Niri gustatzen zaidana da liga erregularreko txapelduna talde erregularrena izatea. Iaz gu izan ginen, eta aurten ez. Hau da, aurten mesede egin digu, iaz kaltetu gintuen modu berean. Horrela ere, titulua ez dugu itzuliko», adierazi du kapitainak.
«Aurten ligako kanporaketen formatuak mesede egin digu. Izan ere, ligako fase erregularrean hirugarren postuan bukatu genuen, baina titulua irabaztea lortu dugu kanporaketen sistemari esker. Egia da formatu hau ez dela bidezkoena, liga lehen postuan bukatzen duena delako erregularrena», aitortu du Aallak. Ildo beretik mintzatu da Erauskin: «Ligak hamar hilabeteko iraupena du, eta tituluak, superkopa salbu, azken hilabetean jokatzen dira. Orduan, fisikoki eta mentalki zama handiarekin iristen gara sasoi bukaerara. Horrela ere, eskubaloiarentzat oso positiboa da. Pabiloiak bete dira eta telebista bidezko emankizunek audientzia izan dute».
«Ez gara ligako talde erregularrena izan, baina sasoi bukaerara iaz baino askoz hobeto iritsi gara»
Maddi Aalla Bera Berako jokalaria
Espainiako Kopa irabazita, agerikoa da donostiarrak izan direla aurten txapelketako erregularrenak. Iazkoa eskuratu ostean, aurten azken fasea antolatzea egokitu zitzaien, duela bi urte gertatu moduan. Halere, 2022an huts egin zuten finalerdietan, eta Illunbeko finala jokatu gabe geratu ziren. Aurten, ordea, maila bikaina emanda iritsi ziren maiatzaren 12ko finalera, eta Valladolid hartu zuten mendean (32-24). Espainiako Superkopa, berriz, iazko irailaren 9an altxatu zuten, Gaska kiroldegian jokaturiko final lehiatuan. Malaga indartsuaren kontra jokaturiko partida berdinketarekin bukatu zen (28-28). Penaltietan erabaki zen, eta donostiarrek asmatu zuten ate aurrean (3-2).
Europako Liga begiz jota
Dena irabazi arren, helburu guztiak bete gabe bukatu du denboraldia Bera Berak. Iazko azaroan oso gutxigatik ez zuten lortu Europako Ligako multzoen fasera sailkatzea. Arerio gogorra egokitu zitzaien Q3 kanporaketan: Norvegiako Sola HK. Joanekoan zazpi goleko aldearekin galdu zuten, eta itzulerakoan gertu izan zuten balentria. Izan ere, sei golengatik irabazi zuten (34-28). Gol bakarrarengatik ihes egin zion taldeari multzoen faseak. Horiek horrela, datorren denboraldiko helburu garrantzitsuenetako bat urrats hori egitea da.
«Oso gertu egon gara aurten. Urteroko erronka da, eta datorren sasoian berriz ere saiatuko gara. Duela urte batzuk Europan jokatzeko aukera izan nuen taldearekin. Fase eta esperientzia oso polita da. Bera Berak merezi du berriz ere fase horretara iristea», esan du Menendezek. Hasieratik «Europari begira» egon behar dutela adierazi du Erauskinek: «Geratzen zaigun pauso hori berriz ere emateko garaia da. Aurten nahiko gertu geratu gara, eta, beraz, helburu hori betetzen ahaleginduko gara. Ez gara erotu behar kontu horrekin, baina helburu garrantzitsutzat hartu behar dugu».
Aallak ez du Bera Beran jarraituko datorren sasoian, baina zale bat gehiago izango dela dio. «Oso hurbil izan du helburua taldeak, eta ikusi beharko da datorren denboraldiko taldea nolakoa den. Batez ere, aldaketa asko baldin badaude. Ni hemen egon ez arren, asko poztuko nintzateke Bera Bera Europako hurrengo faserako sailkatzen bada».
Joan-etorriak
Bera Bera aurtengo denboraldia bukatu aurretik hasi zen hurrengoa prestatzen eta egituratzen. Urteak daramatzate horrela, besteak beste, talde ahalik eta lehiakorrena osatzeko. Klubak joan-etorriak iragarri ditu. Batetik, egin dituzten bost fitxaketak: Eszter Ogonovszky hungariarra, Elba Alvarez galiziarra, Francisca Araujo Joao angolarra, Tamara Kostic serbiarra eta Lucia Prades espainiarra.
Taldea utziko duten jokalariak, berriz, hainbat dira. Maddi Aallarekin batera, Bera Berak beste zazpi jokalariren agurra jakinarazi du: Alice Silva, Alice Fernandes, June Loidi, Lydia Blanco, Malena Cavo, Mariane Fernandes eta Emma Boada.
Aurten lorturiko hiru tituluak apalean gordeta, gehiagoren bila joateko garaia da, Europako Ligako multzoen fasera iristearekin batera.