Liderra mendean hartu dute
Realeko belar hockey taldeak ezustekoa eman du Zubietan, Club de Campori irabazita (2-1).
Realeko neskak gol bat ospatzen, Zubietan.Reala 
Jone Alba Realeko belar hockey jokalariak iragarri zuen hedabide honetan: “Madrilgo Club de Campo da indartsuena. Normalean, dena irabazten dute, maila oneko jokalari internazionalak dituztelako. Halere, gure kontra uste baino gehiago sufritzen dute”. Sufritu ez ezik, baita galdu ere. Txuri-urdinek Club de Campo liderra mendean hartu zuten atzo, Zubietan (2-1). Hain zuzen ere, Albaren golari esker irabazi zuten norgehiagoka. Leire Zubizarretak egin zuen aurreneko gola, eta madrildarrek berdintzea lortu ondoren, Realeko donostiarrak egin zuen gol erabakigarria. Garaipenari esker, sailkapeneko seigarren postuan daude, baina bosgarrena den Polorekin berdinduta —17 puntu dituzte bi taldeek—.
Izotz hockeyan, berriz, Txuri Urdineko bi taldeek galdu egin zuten. Neskena izan zen mingarriena, lidergoa jokoan zutelako. Ordea, huts egin zuten Puigcerdaren pistan, eta golik egin gabe itzuli ziren Donostiara (5-0). Ondorioz, sailkapen nagusiko buruan hiru talde daude berdinduta: Majadahonda, Puigcerda eta Txuri Urdin. Mutilen taldeari dagokionez, Anoetako izotz pistan ez zuten lortu Majadahonda gainditzea (2-5). Erregulartasuna topatu ezinda jarraitzen dute, beraien sasoi puntu onenetik urrun.
Futbolean, Realak galdu egin zuen San Mameseko derbia (1-0). Azken urteotako joera ezkorrari segida emanez, txuri-urdinak ez ziren lehiakorrak izan. Lehen zatian makal aritu ziren, eta Athelticek hori bera aprobetxatu zuen neurketako gol bakarra egiteko. Bigarren zatian, Reala hobea izan zen, baina ez zuen zuri-gorrien ate aurrean asmatu. Ohikoa bihurtu den zerbait da. Bartzelonari etxean irabazita hartu zuten arnasa zertxobait moztu zitzaien atzo. Bestalde, Realeko neskek eta Real Madrilek jokatu beharreko neurketa bertan behera geratu zen haize boladengatik.
Saskibaloian, Ibaeta Basketek ligan ere topatu du bere bidea. Cai La Seu gainditu zuten Gaska kiroldegian (77-73), eta sailkapenean gora egiten ari dira. Hamabigarren tokian daude orain.
EMAITZAK
Belar hockeya
Emakumezkoen ohorezko maila, 10. jardunaldia
- Reala 2 – Club de Campo 1
Izotz hockeya
Gizonezkoen liga, 9. jardunaldia
- Txuri Urdin 2 – Majadahonda 5
Emakumezkoen liga, 9. jardunaldia
- Puigcerda 5 – Txuri Urdin 0
Futbola
Emakumezkoen liga, 11. jardunaldia
- Reala – Real Madril (bertan behera)
Gizonezkoen liga, 14. jardunaldia
- Athletic 1 – Reala 0
Saskibaloia
Emakumezkoen liga, 8. jardunaldia
- Ibaeta Basket 77 – Cadi La Seu 73
