Amenabarren obra bat gelditu dute, Ijenteako eraikinean baimendutakoa baino etxebizitza bat gehiago egin nahi izateagatik
EH Bilduk atzo salatu zuenez, 26 etxebizitza eraikitzea aurreikusi duten arren, 27 eraikitzen ari dira.
Luxuzko etxebizitzen aurkako elkarretaratzea, Ijentea kalean.AZGA 
Donostiako Udaleko Hirigintza Sailak Ijentea 2 eraikineko obra geldiarazteko agindua eman du. Udaleko iturrien arabera, “bizilagun baten kexan” oinarritu dira erabaki hori hartzeko. Dena dela, atzo EH Bilduk salatu zuen eraikin horretako lanetan “irregulartasunak” zeudela. Izan ere, 26 etxebizitza eraikitzeko baimena izan arren, 27 iragartzen ari direla salatu zuen udal taldeak. Udalak zehapen espedientea hasi du, lizentzia jaso zuen proiektuan aurreikusitakoak baino etxebizitza bat gehiago eraikitzen ari zirela ikustean.
Aipatu eraikinak Bulebarrarekin eta Kale Nagusiarekin bat egiten du eta udaletxearen aurrean dago. Amenabar enpresak eraikina erosi zuen, luxuzko 26 etxebizitza egiteko, beheko solairuan merkataritza lokalak mantenduz. Fatxada ez da aldatu, eraikin babestua baita, baina apaindurazko argiztapenarekin egokitu da.
Atzo EH Bilduk salatu zuen ustezko irregulartasuna: “Gauzatzen ari den proiektua Udalak baimendutako proiektuarengandik ‘aldentzen’ ari dela dirudi. Obretan badira aldaketa esanguratsuak, eta froga daitezke”, adierazi zuen Ricardo Burutaran zinegotziak, zehaztuz lizentziak luxuzko 26 etxebizitza eraikitzea aurreikusi arren, gaur egun fatxada estaltzen duen oihalak bi eta hiru logelako 27 etxebizitza esklusibo’ iragartzen dituela. “Estalki bat jarri zen iaz, eta bertan zehazten zen eraiki beharreko etxebizitzak 26 zirela, baina gero aldatu egin zen gaur egun jarrita dagoenagatik. Bertan, 27 etxebizitza sustatzen dira, nahiz eta lizentzia aldatu ez”.
