Arrakastatsua izan da Antiguako krosaren itzulera
500 lagunek baino gehiagok parte hartu dute Antiguako krosean.Asier Gonzalez de San Pedro 
Hotza berotzeko korrika aritu dira eguerdian Antiguako sansebastianetan. Jai batzordeak Antiguako krosa berreskuratzea erabaki du aurten, eta izan duen harrera ikaragarria da. 500 lagunek baino gehiagok eman zuten izena, eta prest agertu dira auzoko kaleak lasterka igarotzeko.
Emaitzei dagokienez, nesken kategorian, Fernanda Fleischmann izan da irabazlea, Nerea Egia bigarrena eta Maider Etxeberria hirugarrena. Mutilen kategorian, aldiz, Aitor Etxeberria izan da garaile, Harkaitz Irazusta helmugaratu da bigarren eta Oier Saldias hirugarren. Irazusta izan da, bestalde, lehenengo antiguatarra.
2012an utzi zioten krosa egiteari. Orduan, Platero atletismo taldeak antolatzen zuen. Dena dela, tradizio haren testigua hartu dute jaietako antolatzaileek programan barneratzeko. Izan duen arrakasta ikusita, seguru jarraipena emango diotela.
Asier Gonzalez de San Pedro argazkilariak osaturiko irudi bilduma ikusgai duzue segidan:
