Lau pertsona atxilotu dituzte droga trafikoagatik Donostian
Ertzaintzaren kontrol bat, artxiboko irudi batean.Irekia 
Ertzaintzak hiru gizon eta emakume bat atxilotu ditu azken egunotan Donostian, droga trafikoko delituak egotzita; horietako biri indarrez lapurreta bat egin izana ere leporatzen diete.
Lehenengo bi atxiloketak asteazken goizean egin zituzten. Ertzaintzak azaldu duenez, dei bat jaso zuten egun horretako goizean, 10:10ak aldera, “Aiete auzoan ibilgailu bat zabarkeriaz zihoala esanez, semaforoak fase gorrian gaindituta”. Patruila batek ibilgailua aurkitu eta autoa geldiarazi zuen, baita barruan zihoan bikotea identifikatu ere. Jarraian, Udaltzaingoaren patruila bat bertaratzeko eskatu zuten, gidariari drogak detektatzeko proba egiteko.
“Ertzaintzaren eta Udaltzaingoaren agenteek bikoteari egindako azaleko miaketan, emakumeari 49 gramo anfetamina sulfato speed aurkitu zizkioten barruko arropan ezkutatuta. Motxila aztertu ondoren, bisturi bat, defentsa pertsonaleko esprai bat eta hauts marroia zuen poltsatxo bat aurkitu zituzten”, azaldu du Ertzaintzak. Gizon bat eta emakume bat zihoazen autoan, eta agenteek atxilotu egin zituzten, droga trafikoko ustezko delitu bat egotzita.
Handik ordu batzuetara egin zituzten beste bi atxiloketak. Hain zuzen ere, 13:20ean, beste abisu bat jaso zuen Ertzaintzak, atxilotuetako baten etxebizitzan bi gizon lapurreta bat egiten ari zirelakoan. Ertzaintzaren arabera, agenteak etxebizitzara sartu ziren, eta, ikuskapenean, “logeletako batean substantzia prentsatu marroia zuen poltsa bat aurkitu zuten. Egongelan, berriz, disolbatzailea eta amoniakoa aurkitu zituzten. Agenteetako bat etxetik atera zen hirugarren solairutik zetorren zarata bat entzun ondoren, eta igo zenean plastikozko poltsa bat aurkitu zuen. Poltsa horren barruan 200 gramo speed baino gehiago zituen beste poltsa bat zegoen, hoztuta zegoen substantzia bat, doitasun baskula bat, landare gai berdezko poto bat, hainbat sendagairen pilulak, bi koilaratxo behealdean erreta eta zenbait metxero”.
Poliziaren prentsa oharrak dioenez, “minutu batzuk geroago, ertzainek inplikatuetako bat aurkitu zuten lapurtutako etxebizitzaren ondoko ataritik irteten. Jarraian, pertsona hori atxilotu zuten, gauzetan indarra erabiliz lapurreta egitea eta droga trafikoko delitu bat egotzita. Ikerketa lanekin jarraituz, atxilotua behartutako etxebizitzara jabearen anaiarekin batera sartu zela jakin zuten. Handik gutxira, polizia baliabideak bigarren inplikatuaren etxera joan ziren, eta atxilotu egin zuten, delitu berberengatik”.
Hurrengo egunetan, agenteak etxe horretan sartu zen miaketak egiteko, eta, Ertzaintzaren arabera, speed hondarrak zituen poltsa bat, 80 gramo ketamina baino gehiago zituen beste poltsa bat eta doitasun baskula bat aurkitu zituzten bertan. Ostiralean, polizia eginbideak amaituta, epailearen esku utzi zituzten lau atxilotuak.
