Saizarbitoriaren 'Ehun metro' audioliburua argitaratu du EITBk
Euskal Literaturaren Hilabetea ekimena abiatu du EITBk, bere audio plataforman garatutako proiektua, apirilaren 1etik 23ra bitartean euskarazko hamaika audioliburu argitaratuko dituena. Ekimen honen bidez, euskal literaturaren aberastasuna “modu berritzailean eta eskuragarrian zabaldu nahi da, irakurleak eta entzuleak euskal letretako egile handien obretara hurbilduz”. Euskal idazle garaikide handien lanak formatu digitalean eskainiko dira, euskarazko sormen-lanak sustatuz eta audioaren bitartez literatura biziberrituz.
Lehen liburua, gaur bertan saretuko dena, Ramon Saizarbitoriaren Ehun Metro da (Iñaki Beraetxe ahots nagusian, Maddalen Arzallus, Asier Hormaza, Kiko Jauregi, Mikel Garmendia, Joxe Felipe Auzmendi eta Iñigo Aranberrirekin batera. Asteazkenean, Arantxa Urretabizkaiaren Zergatik Panpox (Maria Redondo) eta ostiralean Anjel Lertxundiren Hamaseigarrenean aidanez (Monika Erdozia) izango dira eskuragai.
Hurrengo astean, Harkaitz Canoren lau eleberri argitaratuko dira, guztiak ere Joxe Felipe Auzmendiren ahotsean: apirilaren 7an, Twist; apirilaren 9an, Fakirraren Ahotsa ; apirilaren 10ean Beti Oporretan, eta apirilaren 11n, Telefono Kaiolatua. Apirilaren 14ko astean, Jon Arretxeren Xahmaran (Ainhoa Aierbe) eta apirilaren 17an, Anjel Lertxundiren Horma (Iñaki Beraetxe) izango dira streaming plataforman. Sorta osatzeko, apirilaren 21ean, Iban Zalduaren Etorkizuna (Iñaki Arretxe) eta 23an, Toti Martinez de Lezearen Judu Kale (Monika Erdozia).
Euskarazko 11 audioliburu argitaratzearekin EITBk euskal kultura eta hizkuntza sustatzeko konpromisoa adierazi nahi du, “euskal literatura kontsumo ohitura digital berrietara egokituz, eta belaunaldi gazteen artean zabaltzea sustatuz”. Audio formatuak “gorakada nabarmena” izan duen testuinguruan, ekimen honek euskal idazle ospetsuen lanetara hurbiltzeko aukera errazten duela uste du EITBk, “irakurketarako zailtasunak dituztenentzat edo formatu hau nahiago dutenentzat oztopoak apurtuz”.
