Donostia emakumezkoen kirolaren hiriburu bihurtuko da 'Tour Universo Mujer' ekitaldiarekin
Urriaren 4an eta 5ean izango da XXXI. Tour Universo Mujer ekitaldia, Alderdi Ederreko lorategietan. Horrela, Donostia emakumezkoen kirolaren hiriburu bihurtuko da, aire zabalean egiten den handienetako bat. Helburua emakumeen kirola sustatzea da, emakumeak gizartean duen aintzatespenaren oinarri gisa, gure kirolariek urte hauetan lortutako ahaleginak, erronkak eta arrakastak ikusaraziz.
Hiriaren erdigunea aire zabaleko kiroldegi bihurtuko da, mundu guztiak kirola egin dezan eta 35 diziplina ezberdin goza ditzan, hala nola pilota, futbola, tenisa, boloak, badmintona, arku tiroa, boxeoa… Bisitariek kirol jardueraz, lehiaketez eta erakustaldiez gozatu ahal izango dute, bertako kirolariekin eta txapeldun nazionalekin batera. Gainera, mota guztietako ikusleen gozamenerako pentsatuta dagoen ekitaldiak agertoki handi bat izango du, non fitness maratoi bat eta zumba klaseak egingo diren, hainbat sorpresaz gain. Zumbako erregina, Jessica Exposito, erakargarri horietako bat izango da, bi masterclass magistralekin, larunbat arratsaldean eta igande goizean.
Aurkezpen ekitaldian izan dira Ane Oyarbide, Berdintasun zinegotzia; Iñaki Gabarain, Kiroletako zinegotzia; Beatriz Vesperinas, Kirol Kontseilu Goreneko Emakume eta Kiroleko zuzendariorde ondokoa; Eduardo Lobato, Iberdrolaren Euskadiko ordezkari komertziala; Alba Menéndez, Bera Berako eskubaloi jokalari ohia eta Irene Senac, CHH Txuri Urdineko entrenatzailea, Tourraren amabitxi ere izango direnak Donostian; eta Ruben Gonzalez, Tour Universo Mujer-eko zuzendaria. Era berean, ekitaldian parte hartuko duten federazioen eta kluben ordezkaritza zabala egon da.
Ane Oiarbide Berdintasun zinegotziak nabarmendu duenez, “Ekitaldi honek Donostiak kirolaren hiri gisa duen izaera indartzen du. Hiriak kirolaren indarrean sinesten du, kohesio soziala bultzatzeko eta benetako berdintasunerantz aurrera egiteko tresna gisa. Horrelakoen bidez, belaunaldi berriak inspiratzea, oztopoak haustea eta estereotipoak eraistea lortzen dugu”. Bestalde, Iñaki Gabarain Kirol zinegotziak gogoratu du, “gure hirian kirol praktikan oso maila altua dugu, batez ere, emakumeen partaidetza oso garrantzitsua da. Errealitate horren adibide gisa, biztanleriarekin alderatuta elite mailako emakumezko talde gehien dituen probintziako hiriburua gara”.
