Realzaleena da altxatu duten kopa
Astea betetzear denean, Realak, Donostiak eta Gipuzkoak oso presente du apirilaren 18ko Sevillako final historikoan irabazitako Espainiako Kopa. Klubaren historiako bosgarrena da; gizonezkoen laugarrena, eta emakumezkoena ahaztu gabe. Zorionez, iragan larunbateko kopa realzaleekin ospatzeko aukera izan zuten jokalariek 2021ean ez bezala—, La Cartujan, Donostiako kaleetan eta Alderdi Ederren, eta Anoeta futbol zelaian.
Irabazitako kopa Aitor Zabaletari ere eskaini zioten Realeko jokalariek.Reala 
«Dena dago urrun / nire etxeko atetik at / sentikortasunik ez / sortasunean lagata». Futbolarekiko eta futbol talde batekiko atxikimendua ez dira derrigorrez baliokideak. Fermin Muguruzaren Urrun abestiak ez du hori iradokitzen, baina hitzen pasarte horrek eta beste batek lotura moduko bat dute apirilaren 18an Sevillan gertaturikoarekin. Realzale asko eta egungo futbol modernoa arbuiatzen duten beste asko poztu ziren pasa den larunbatean, talde txuri-urdinak Espainiako Kopa irabazi zuenean. La Cartuja futbol zelaian gertatu zen, 2021ekoa errepikatuz, baina oso bestelako ospakizunarekin. Izan ere, Realeko jokalariek eta lantaldeko kideek zaleekin batera altxatu zuten klubaren historiako bosgarren kopa.
Donostiatik nahiko urrun dago Sevilla, 900 kilometro baino gehiagoko distantziara. Horrela ere, milaka realzale joan ziren Andaluziako hirira taldea babestera, esperientziaz gozatzera, eta, aukeran, kopa bera bueltan ekartzera. Emaitza ederraz harago, pasa den asteko ostiraletik igandera bizitakoa ez dute sekula ahaztuko. Sevillako Giralda ingurua txuri-urdina izan zen, 48 orduz baino gehiagoz. Noski, finaleko partida gogoangarria ere memorian gordeko dute. Baita ere, Sevillako eta Donostiako Alderdi Ederreko zaleen guneetan elkarturiko milaka zale txuri-urdinek.
Final historikoa
Realaren eta Atletico Madrilen arteko norgehiagoka gorabeheratsua izan zen. Baita emozionalki ere. Duela 39 urte luze jokatu zuen aurreko kopako finala gizonezkoen taldeak. Hain zuzen ere, 1987an Zaragozako La Romareda futbol zelaian gertaturikoa errepikatzea zen helburua. Orduan, Realak Atletico Madril menderatu zuen, penaltietan. Iragana berreskuratzeko eta berridazteko aukera historikoa zuten txuri-urdinek.
Urruntzen ari den final hartara hurbiltzeko unea da. Goraino bete zen La Cartuja zelaian, 25.000 zale txuri-urdinek baino gehiagok babestu zuten Reala, lehen minututik azkeneraino. Tira, aurreneko minutua bete aurretik egin zuen Ander Barrenetxea jokalari donostiarrak estreinako gola (0-1). Gonçalo Guedes portugaldarraren erdiraketa bikaina baliatu zuen buruz baloira sareetara bidaltzeko. Dena dela, Ademola Lookmanek berdindu zuen neurketa, 19. minutuan (1-1). Joan-etorriko lehian, Realak markagailuan berriz ere aurreratzeko modua topatu zuen, atsedenaldira iritsi aurretik. Guedesi penaltia egin zion Juan Musso atezainak, eta Mikel Oiartzabal kapitainak ez zuen hutsik egin hamaika metroetatik, 45. minutuan (1-2).
Bigarren zatian, txuri-urdinek bi urrats atzera egin zituzten, eta madrildarrek hiru aurrera. Zaleek argi ikusi zuten berdinketa, eta horrela izan zen. Realak arerioaren kontroletik ihes egin ezinda, neurketaren azken minutuetan jaso zuen kolpea. 82. minutuan izan zen, eta Julian Alvarezek egin zuen madrildarren bigarren gola (2-2). Finala erabakita uzteko beste aukera argi batzuk izan zituzten arren, txuri-urdinek luzapena behartzea lortu zuten.
Beste hogeita hamar minutu luze jokatu behar izan zituzten bi taldeek. Baita zaleek ere, harmailan zeharo urdurituta. Reala aurkaria baino hobeto aritu zen, baina ez zuen balantza desorekatzeko balio izan. Hortaz, penaltietan erabakitzeko zoriaren esku utzi zuten kopa. Alegia, zori onaren eta txarraren arteko marra finaren menpe. Realak Unai Marrero atezain azpeitiar luzea zuen atean, eta, batek baino gehiagok haren gaua izango zela pentsatu zuen. Zorionez, horrela izan zen, eta bi penalti gelditu zituen, erabakigarriak izan zirenak. Pablo Marinek sarturiko penaltiak bidali zuen kopa Donostiara.
Eztanda txuri-urdina gertatu zen La Cartujan, eta historia errepikatu zen. 1987ko final hartan gertatu moduan, gidoia ia osotasunean bete zen. Orduan ere, Reala bi bider aurreratu zen markagailuan, eta bietan berdindu zuen Atletico Madrilek. Luzapenean ez zen golik izan, eta penaltietan txuri-urdinak nagusitu ziren. Halere, lau sartu zituzten, Luis Miguel Arkonadak penalti bakarra gelditu zuen, eta beste bat kanpora bidali zuten madrildarrek (2-4). Sevillan, ordea, gol bat gehiago egin zuten zuri-gorriek (3-4).
Realzaleen harmaila, La Cartuja futbol zelaian.Reala
Ospakizun luzea
Finala bukatu zen momentu berean hasi zen garaipenaren ospakizuna, nabarmen luzatzeko aurreikuspenarekin. La Cartuja zelaian zaleekin konpartitu zuten kopa izan zen une gogoangarrienetakoa. Realzale guztiei eskaini zieten, baina, bereziki, bizitza eta realzale izatea kendu zioten Aitor Zabaleta donostiarrari. Oiartzabal kapitainak goretsi zuen, kopan haren izena zeraman kamiseta bat jarri eta altxatuta. Urrun abestiak dioena berreskura dezagun: «Jo dezagun abendua, 98. urtean / EEBBek berriz bonbardatu dutela Irak / eta Toulousen poliziak hil duela magrebiar bat / eta Madrilen faxistek Aitor Zabaleta euskalduna». Ez dirudi horren urrun gaudenik.
Aldiz, gertu samar dago astebetean bizitako guztia. Realeko protagonistek pasa den larunbateko gaua luzatu zuten, askotariko ospakizunekin, baita realzale askok ere. Bueltako bidaia biharamunean egin zuten gehienek, nekatuta. Baita jokalariek ere. Tamaina desberdinetako biharamunak izan ziren batzuentzat eta besteentzat. Nolanahi ere, titulu bat ez da egunero eta urtero irabazten. Beraz, mereziko zuen egindako parrandak.
Txapeldunak pasa den igandean Euskal Herriratu ziren. Realari harrera txuri-urdina eta eguzkitsua egin zioten, Hondarribian dagoen Donostiako aireportuan. Eguzkitako betaurrekoak behar izan zituzten jokalariek ajea ezkutatzeko, baina aurpegiko irribarreak erakutsi zituzten. Bidean, zaleen babes amaigabea izan zuten, Zubietaraino iritsi ziren arte. Esker oneko mezuak jaso ostean, atseden hartu zuten, batez ere, hurrengo eguneko ospakizunerako indarrak berreskuratzeko.
Harrera jendetsua
Astelehenean, hiria hainbat orduz gelditu zen. Txapeldunei eta kopari harrera egiteko eguna antolatu zuten, arratsaldean hasi eta iluntzean bukatu zena. Anoeta futbol zelai ondotik abiatu ziren Realeko jokalariak eta lantaldeko kideak hainbat autobusetan. Sabairik gabeko goiko solairutik jauzika, algaraka eta oso pozik egin zuten Anoetatik Alderdi Ederrera bitarteko ibilaldi txuri-urdina. Milaka zale elkartu ziren bide bazterretan.
Udaletxe ondora iritsi zirenerako, zalez mukuru zegoen Alderdi Eder; txuri-urdinez tindatuta. 527 haurrek osaturiko danborrada batek egin zien ongietorria. Ondoren, protagonistak zaleen aurretik pasatu ziren udaletxeko aurrealdera igotzeko. Agintarien ongietorria eta dantzarien agurra jasota, udaletxeko balkoira igo ziren. Oiartzabalek atera zuen kopa, eta Alderdi Ederren zeuden zale guztiei eskaini zien. Hitz batzuk ere egin zituen: «Mila esker hemen gurekin egoteagatik. Berriro esan behar dugu: Kopako txapeldunak gara! Zuen zoriontasuna ikusteak ez dauka preziorik. Eskerrik asko, aupa Reala!».
Hitzartze esanguratsuena, ordea, beste bat izan zen. Pellegrino Matarazzo entrenatzaile estatubatuarrak idatzita zuen diskurtso bat irakurri zuen, euskara hutsean: «Txapeldunak gara. Hau hasi besterik ez da egin. Zuen laguntzarekin, jokalariek gauza handi asko lor ditzakete. Gaur zuei eskerrak emateko eguna da. Lehen egunetik erakutsi didazue zer den Reala. Eskerrik asko. Goazen, Reala!». Bestalde, Marrerok, Elustondok eta Oskarssonek ere zaleak kantuan jarri zituzten. Hain zuzen ere, Elustondo bera arduratu zen ekitaldia borobiltzeaz, udaletxe aurreko oholtzan. Jokalariak, entrenatzailea eta lantaldeko gainerako kideak aurkeztu zituen, banan-banan eta gaztelaniaz. Behar baino gehiago luzatu zen festa.
Donostiako Udalak asteartean iragarri zituen kopako ospakizunarekin loturiko zenbakiak. 45.000 pertsona inguru batu ziren, bi egunetan: 45.000 pertsona larunbatean eta 100.000 astelehenean; horietatik, 64.000 Anoeta eta Alderdi Eder bitarteko bidean egon ziren, Realeko jokalariei babesa ematen.
Erreleboa
Txuri-urdinen zale diren belaunaldi berriek eta ez horren berriek dagoeneko esan dezakete Reala titulu bat irabazten ikusi dutela. Alegia, bertatik bertara. Besteak beste, Gijongo El Molinon eta Zaragozako La Romareda futbol zelaietako garaipen historikoak bizi izan zituzten adinekoen testigantzak berdindu ahal izango dituzte 2026ko apirilaren 18ko kopa garaipenaren lekuko izan zirenek.
