Trump eta Netanyahu Donostian pertsona 'non grata' izendatzeko ekimena atzera bota dute EAJk eta PPk
Elkarrekin Donostiak salatu du EAJk eta PPk ez dutela babestu Donald Trump AEBetako presidentea eta Benjamin Netanyahu Israelgo lehen ministroa hirian pertsona non grata izendatzeko aurkeztutako proposamena. Ekimen hori gaur goizean aztertu da Bozeramaileen Batzordean, eta taldearen arabera, helburua zen udalak nazioarteko egoeraren aurrean jarrera instituzionala adieraztea.
Elkarrekin Donostiak adierazi du proposamenaren bidez “Donostiaren konpromisoa berretsi” nahi zela “nazioarteko zuzenbidearen, giza eskubideen eta biztanleria zibilaren babesaren alde”. Taldearen esanetan, EAJren eta PPren ezezkoak “ez du neutraltasuna” adierazten, baizik eta “gatazkaren aurrean jarrera jakin bat” hartzea.
Victor Lasa bozeramaileak kritikatu egin du bi alderdien erabakia, eta erakunde publikoek halako egoeren aurrean erantzun argia eman behar dutela defendatu du. Haren hitzetan, une hauek garrantzitsuak dira erakundeek herritarren kezkei erantzuteko duten gaitasuna neurtzeko.
