Garaipen batek salba dezake Realaren ligako maila apala
Txuri-urdinek Espanyolen zelaian jokatuko dute, Bera Berak ligako finalerdietako itzulerakoa Gaskan, eta Gipuzkoa Basket ezustekoa ematen saiatuko da Oviedon.
Realaren eta Espanyolen arteko neurketa, Anoetan.Reala 
Denboraldia bukatzera doa, liga ahazteko eta kopako garaipena ospatzen jarraitzeko. Realeko mutilen taldeak sasoi gorabeheratsuko azken neurketa jokatuko du bihar, 21:00etan. Espanyolen zelaian ariko dira, eta garaipena eskuratzea oso lagungarria litzateke giro nahasia baretzeko. Kopa irabazi eta Europa Ligarako sailkatu arren, ligako ibilbidea ez da batere samurra izan. Sergio Francisco irundarraren aginduetara oso kaskar hasi zena konpondu zuen Pellegrino Matarazzo entrenatzaile estatubatuarrak. Ligako joera ezkorra eten, eta taldea altxatzea lortu zuen. Baita apirilaren 18an lorturiko kopa ahaztezin hura ere. Dena dela, txuri-urdinen gabeziak agertu dira kopa osteko ligako partidetan, eta zale askok sasoia irribarre batekin bukatu nahi dute.
Eskubaloian, Bera Berak ligako finalerdietako itzulerakoa jokatuko du bihar Porriñoren aurka, Gaska kiroldegian (19:00). Joanean lorturiko lau goleko abantaila izango dute alde (28-32), eta errenta hori baliatzen ahaleginduko dira finalera iristeko. Etxeko kopa irabazi ostean, ligarekin borobildu nahi dute denboraldia.
Saskibaloian, Gipuzkoa Basketek ezinezkoa dirudiena posible dela erakutsi nahi du. Horretarako, ACB ligara igotzeko kanporaketako hirugarren neurketa irabazi beharko dute. Soilik horrela behartuko dute laugarrena, eta hori irabaziz gero, Donostian erabakiko litzateke. Dena dela, lan asko dute aurretik, eta lehen urratsa gaur egin beharko dute, 20:00etatik aurrera, Oviedoren pistan. Gogoratu behar da Gaskan jokaturiko lehen bi partidak asturiarrek irabazi zituztela.
Belar hockeyan, Realeko neskek ligako azken norgehiagoka jokatuko dute etzi, Zubietan (11:00). Aurrez aurre, Taburiente izango dute, sailkapenean gainetik duten taldea. Menderatzen badituzte, sailkapenean berdintzeko eta gaintzeko aukera izango lukete. Hau da, liga sailkapeneko zortzigarren postuan bukatu dezakete.
PARTIDAK
Futbola
Gizonezkoen lehen maila, 38. jardunaldia
- Espanyol – Reala (bihar, larunbata, 21:00)
Eskubaloia
Emakumezkoen ligako finalerdiak, itzulerakoa
- Bera Bera – Porriño (bihar, larunbata, 19:00)
Saskibaloia
Gizonezkoen bigarren maila, lehen mailara igotzeko kanporaketa
- Hirugarren partida: Oviedo – Gipuzkoa Basket (gaur, ostirala, 20:00)
- Laugarren partida (behar izanez gero): Oviedo – Gipuzkoa Basket (etzi, igandea, 17:00)
Belar hockeya
Emakumezkoen liga, 22. jardunaldia
- Reala – Taburiente (etzi, igandea, 11:00)
