PSE-EEk eskatu dio EH Bilduri argitzeko «etxebizitza babestua eraikitzearen alde edo kontra» dagoen
Auditz Akular eremua, errepidearen eta Altzako etxeen artean.Joseba Parron San Sebastian 
Altzako Auditz Akular eremuan etxebizitzak eraikitzeko asmoari eusten dio PSE-EEk, eta, EH Bilduk garapen horren aurka berretsi duen jarrera kritikatu dute. Sozialisten ustez, “agerian uzten du koalizio subiranistak etxebizitzaren arloan duen kontraesan iraunkorra”. EH Bilduk plazaratu duen prentsa oharra deitoratu du Ane Oiarbide sozialisten bozeramaileak: “Zaila da aldi berean etxebizitza gehiago eraikitzeko beharra defendatzea eta hori posible egiten duten proiektuak sistematikoki baztertzea”.
Herritarrek “argitasuna” merezi dutela gaineratu du Oiarbidek, “ezin delako babes ofizialeko etxebizitza gehiago eskatu, hiriaren etxebizitza eskaintza handitzea ahalbidetzen duten garapenak behin eta berriz zalantzan jartzen diren bitartean”. Sozialistek gogorarazi dute Donostiak “etxebizitza larrialdi bati aurre” egin behar diola, eta horrek “erantzukizunez eta errealismoz” jardutea eskatzen duela: “Hiriak eskura dituen tresna guztiak aktibatu behar ditu babes ofizialeko eta etxebizitza eskuragarrien parkea handitzeko, hiri-berroneratzea, sustapen berriak eta erakundeen arteko lankidetza uztartuz”.
Hiri garapenaren ereduei buruz eztabaidatzeko prest agertu da PSE-EE, baina ohartarazi du EH Bilduren alternatibek “ezin dutela aitzakia izan hiriak orain hartu behar dituen erabakiak gehiago atzeratzeko”. Oiarbideren esanetan, EH Bildurentzat etxeak eraikitzea “arazo bat” izan da, eta ez “konponbide bat”. “Gaur egun etxebizitza eskaintza handitzeko beharra aurkitu duela dirudi, baina Auditz Akular moduko proiektu estrategikoen aurrean jarrera bera mantentzen du. Hamabost urte geldirik daramatzan eremu bat da, eta bertan lur publikoak erosi ziren, gaur egun lurperatuta dagoen inbertsio bat eginez. Gero eta zailagoa da kontraesan hori azaltzea”, nabarmendu du sozialisten bozeramaileak.audi
