Donostian tasa turistikoa kobratzen hasiko dira 2027ko urtarrilaren 1ean
EAJk, PSE-EEk eta Elkarrekin Gipuzkoak iragarritako akordioaren ondoren, eta EH Bilduren babesarekin, Gipuzkoako Batzar Nagusiek gaur onartu dute turismoaren gaineko zerga.
Turista batzuk Donostian. Inaxio Esnaola 
Gipuzkoako Foru Aldundiak tasa turistikoa aplikatuko du 2027ko urtarrilaren 1etik aurrera. Jon Insausti Donostiako alkateak zerga indarrean lehenago sartzea eskatu zuen arren, hirian datorren urtearen hasieran hasiko dira kobratzen. Haren alderdiak, EAJk, horrela erabaki zuen pasa den astean, PSE-EE aldundiko bazkidearekin eta Elkarrekin Gipuzkoarekin akordioa sinatu ondoren. Horrela ere, Insaustik “donostiarren garaipen gisa” ospatu du zerga turistikoaren onarpena.
Hain zuzen ere, gaur onartu dute Gipuzkoako Batzar Nagusietan, EH Bilduren babesarekin eta PPren abstentzioarekin. Hain zuzen ere, Mikel Lezama bozeramaile popularrak eta Donostiako zinegotzi ohiak “neurria atzeratzea” kritikatu du: “Donostiak urteak daramatza eskatzen. Gure lurra bisitatzen dutenek ere lagundu egin behar dute. Donostiak tasaren ahalik eta azkarren aplikatzea eskatzen du, eta zuek hemen geldiarazteko eskatzen duzue. Aldundiaren gehiengoak 2027ra atzeratu du. Alkateak uda honetarako bizkortzeko eskatu zuen publikoki”.
Itziar Agirre Ogasun eta Finantzetako diputatu jeltzaleak, berriz, adostasun zabala nabarmendu du. “Udalerri bakoitzak bere beharren arabera erabakiko du tasa; turismo iraunkorragoa eta orekatuagoa ahalbidetuko duen neurri malgua da. Era proportzionatuan erantzun nahi diegu jarduera honen ondorioei, baita udalerriei tresnak eman ere”, gaineratu du.
