Altxamendu faxistan Donostia defendatu zuten herritarrak omendu ditu EH Bilduk
Urdintzuko zubian egin du omenaldia EH Bilduk.Maddi Viana 
EH Bilduk omenaldia egin du Loiolako Urdintzu zubian, kuartelen parean, 1936ko altxamendu faxistan Donostia defendatu zuten herritarrak gogoratzeko. Gertaera ez oso ezaguna dela adierazi du Juan Karlos Izagirre Donostiako EH Bilduko bozeramaileak, hala ere, altxamenduan parte hartu zuten herritarrei aitortza egitea garrantzizkoa dela nabarmendu du.
Izagirrek ziurtatu du “diskurtso totalitarioak” gero eta zabalagoak direla eta “indar gehiago hartzen” ari direla, bai nazioartean, baita bertan ere. Horregatik, gaineratu du alkate ohiak, hiri eta herri gisa “jarrera antifaxista bat edukitzeko eta diskurtso totalitario hauei aurre egiteko” beharra ikusten duela EH Bilduk.
Markel Ormazabal zinegotziak ere hitz egin du omenaldian, eta Izagirrerekin bat eginez, adierazi du garrantzitsua dela “gaur egungo totalitarismoaren gorakadaren aurrean, herri antolatuak kolpe faxistak gelditzeko gaitasuna duela” gogorarazten duen egun bat oroitu eta ospatzea.
Omenaldiari amaiera ematek,o arrosa gorriak bota dituzte Urumea ibaira, altxamenduan parte hartu zuten herritar guztien omenez.
Omenaldia amaitzerakoan arrosa gorriak bota dituzte ibaira.Maddi Viana
90 urte altxamendutik
Josetxo Otegi historialariak azaldu ditu 1936ko uztailaren 28ko nondik norakoak. 90 urte pasa dira militar kolpistak errenditu zirenetik, 1936ko uztailaren 18an eman zen estatu kolpea eta Donostian zeuden militarrek ez zuten berehala bat egin kolpe faxistarekin.
Uztailaren 22a izan zen Donostia hartzera irten ziren eguna, baina herritarrak (Donostiakoak eta Gipuzkoakoak, gogorarazi du Otegik) kolpe faxistaren aurka agertu ziren eta, hainbat borrokaren ostean, “Donostiako herriaren garaipena” gertatu zen adierazi du historialariak, eta gaineratu du oso garaipen garestia eta laburra izan zela.
Garaipena herri antolakuntzari esker eman zela aipatu du Otegik, eta gaur egun oraindik ere daukan garrantzia nabarmendu du. Bi hilabete iraun zuen garaipenak, irailaren 13an sartu ziren eta indar frankistak Donostiara, Irungo frontea erori ondoren.
