Road to Practitioner programa, konputazio kuantikoan aditu gehiago sortzeko
Konputazio kuantikoak gero eta presentzia handiagoa du EAEko ikerketa eta enpresa esparruan, eta horretarako beharrezkoa da teknologia horretan prestatutako profesionalen komunitatea handitzea. Horretan laguntzea du helburu Road to Practitioner (R2P) programak. BasQk eta IBMk elkarlanean antolatutako prestakuntza ekimenaren hirugarren edizioa gaur abiatu da, 60 parte hartzailerekin.
Hiru hilabeteko prestakuntza programak teoria eta praktika uztartuko ditu. Parte-hartzaileek Qiskit programazio lengoaian sakonduko dute eta konputazio kuantikoaren inguruko hainbat arlotan trebatuko dira. Besteak beste, erabilgarritasun eskalako algoritmo kuantikoak, algoritmo bariazionalak, Quantum Machine Learning eta simulazio hamiltoniarra landuko dituzte. Horrez gain, Qiskitek eskaintzen dituen tresna berriak ezagutuko dituzte, besteak beste, transpilazioa, erroreen arintzea eta zirkuitu dinamikoak.
Prestakuntza ez da ikasgela teorikora mugatuko. Ariketa praktikoak egingo dituzte eta programaren amaieran Capstone Project bat garatu beharko dute, ikasitakoa benetako proiektu batean aplikatzeko. Edizio honetan parte hartzen dutenen artean profil ugari dago: gradu eta masterretako ikasleak, unibertsitateko irakasleak, ikertzaileak eta enpresetako profesionalak. Multiverse Computing, Global Data Quantum, Quantum Mads, Accenture, LKS Next, Lantek Sheet Metal Solutions eta Nasertic enpresetako langileek, besteak beste, bat egin dute ekimenarekin. Ikerketa eta teknologia arloko ordezkariak ere badaude, DIPC, BCAM eta LORTEK zentroetakoak kasu.
Teknologia kuantikoa enpresetara eramateko prestakuntza
R2Pren helburuetako bat ezagutza teorikoa “negozio aukeretara eta erabilera praktikoetara” eramatea da. “Konputazio kuantikoak potentzial handia izan dezake hainbat arlotan, hala nola optimizazioan, materialen zientzian, osasunean, bizitzaren zientzietan eta energiarekin lotutako ikerketan”, azaldu dutenez.
Horregatik, programaren bidez enpresetako profesionalek teknologia horrek beren jardueran izan dezakeen erabilera aztertzeko lehen urratsak eman ditzakete. Prestakuntzak, gainera, IBM Quantum System Two bezalako azpiegitura kuantikoekin lan egiteko oinarriak eskaintzen ditu.
Hasiera jardunaldian IBM Quantumeko adituek parte hartu dute, eta lehen saio praktikoetan parte hartzaileei laguntza zuzena eman diete. Igor Campillo Euskampus Fundazioko zuzendariak ere hartu du hitza, eta BasQren estrategia eta talentuaren prestakuntzak euskal ekosistema kuantikoan duen garrantzia azaldu du.
Programan BasQ Advocates taldeak ere izango du zeregina. Komunitateko kide horiek parte-hartzaileen mentoretzan arituko dira eta saio praktiko batzuk gidatuko dituzte. Horrela, prestakuntza teknikoaz gain, programan parte hartzen dutenen arteko harremanak eta lankidetza sustatu nahi dira.
R2Pren hiru edizioetan ia 200 lagunek jaso dute dagoeneko konputazio kuantikoari buruzko prestakuntza. BasQren arabera, komunitate hori handitzea funtsezkoa da Euskadik teknologia kuantikoen garapenean nazioarteko posizioa sendotu dezan.
Basque Quantum (BasQ) Eusko Jaurlaritzako Zientzia, Unibertsitate eta Berrikuntza Sailaren, Arabako, Bizkaiko eta Gipuzkoako foru aldundien eta Ikerbasque Fundazioaren ekimena da. Euskadi ikerketa, talentu eta berrikuntzaren arloan nazioarteko erreferente kuantiko bihurtzea du helburu.
