Segiren kontrako sarekada batean atxilotutako 30 lagunek haien torturak ikertzeko eskatuko dute
Segiko gazte auziperatuak, absolbitu berri.40ak libre 
Euskal Herriko Giza Eskubideen Behatokiak (GEBehatokia) ekimen judizial kolektibo bat aurkeztuko du larunbatean, urriaren 3an, Donostian. Hogeita hamar bat lagunek beren atxiloketa eta inkomunikazio garaian jasandako ustezko tortura kasuak judizialki berriro ikertzeko eskatuko dute.
2009ko azaroan Segiren kontra egindako polizia operazio batean 34 pertsona atxilotu zituzten Euskal Herriko hainbat tokitan, eta beste zortzi atxilotzen saiatu ziren. Azken horietako batzuk Italian eta Ipar Euskal Herrian atxilotu zituzten, eta Espainiako justiziaren esku utzi zituzten. Sarekada horretan atxilotu zituzten Garazi Rodriguez, Mikel Eskirotz, Aitziber Arrieta, Maialen Eldua eta Asier Coloma donostiarrak. Azken honek ez zuen torturarik salatu, Ipar Euskal Herrian atxilotu baitzuten, inkomunikazio aldirik gabe.
GEBehatokiak adierazi duenez, atxilotutako pertsona guztiek torturak salatu zituzten. Hori dela eta, kasu horiek berriro auzitegietan aztertzea eskatuko dute, salaketen inguruan orain arte egindako ikerketa judizialik eza salatuz.
Erakundeak gogorarazi du Espainiako Auzitegi Nazionalak 2014ko maiatzean emandako epaian operazio horretako akusatu guztiak absolbitu zituela. Epaiak, GEBehatokiaren arabera, tortura salaketak ikertzeko instrukzioan hartutako neurrien inguruko aipamenak jasotzen zituen, eta inkomunikazio aldian atxilotuek zuten zaurgarritasun egoera ere jaso zuen. Aipagarria da Garazi Rodriguez donostiarraren kasua, Espainiako Auzitegi Konstituzionalak bere tortura salaketak ikertzeko eskatu baitzuen 2016an.
Orain aurkeztuko duten ekimenaren bidez, hogeita hamar bat lagunek beren kasuak berriro ikertzea eta, hala badagokio, erantzukizunak zehaztea eskatuko dute. GEBehatokiak azaldu duenez, helburua da tortura salaketen inguruan egia judiziala, justizia eta erreparazioa lortzea. Prentsaurrekoa larunbatean egingo dute Donostian, eta bertan ekimenaren xehetasunak eta parte hartuko duten pertsonen eskaerak azalduko dituzte.
