Ibon Martinek 'Bajamar' eleberria aurkeztu du
Ibon Martin idazle donostiarra.Joseba Parron San Sebastian 
Ibon Martin idazle donostiarrak Bajamar bere eleberri berria aurkeztu du. Lekeition dago girotuta thrillerra, eta Jon Agirre jarri du tramaren erdigunean. Agirre bigarren aukera baten bila Madrildik kostaldeko herri horretara iritsitako familia medikua da. Turismo jasangarriaren defendatzaile den influencer baten heriotza misteriotsua eta pisu turistikoen presioa dira idazle donostiarraren lan berriaren ardatzak.
Argitaletxeak nabarmendu duenez, eleberriak “itxuraz idilikoa” den herri batean kokatzen du irakurlea, baina bertako bizikidetza pitzatzen hasia da pisu turistikoen presioaren, higiezinen espekulazioaren eta tokiko bizimodua baztertua izaten ari delako sentsazioaren ondorioz. Testuinguru horretan, gaztearen heriotzak herriko interes kontrajarriak azaleratzen ditu, eta agerian uzten du ingurunearen defentsak eta esposizio publikoak gatazkaren erdigunean jarri dutela.
