Senaren sokari tiraka doaz aurrera
Antiguako Soka hirukoak 'Ez da hemen' lan laburra plazaratu du, beraien ibilbideko bigarren urratsa. Rock indartsua eta dantzagarria uztartzen dituen bost pieza ditu, egun jorratzen dutenaren erakusgarri.
Mikel Arzelus, Patxi Crespo eta Beñat Gartzia taldekideak, ezkerretik eskuinera.Batix Ezeiza 
Hasiberriak izan arren, hesi bat jarri diote lan berriari. Hiru urtetan hazi egin da Antiguako Soka taldea, eta argiago dute nahi dutena, eta, batez ere, nahi ez dutena. Hemen ez da izenburua jarri diote irailaren 17an kaleratu zuten bigarren lanari. Ordea, orain da hirukoaren garaia.
Beñat Gartzia gitarra jotzailea, Mikel Arzelus baxu jotzailea eta Patxi Crespo bateria jotzailea zein abeslaria dira soka berari lotuta daudenak. Lehen biekin elkartu da hedabide hau, argitalpenaz eta beste hitz egiteko, baina korapilatu gabe.
Hemen ez bada, non? «Batzuei pasatzen zaigu, bizitzan askotan ez dakigula zer nahi dugun eta non den. Ordea, badakigu non ez den. Hortik abiatuta, badakigu zer ez dugun nahi. Halako batean jakingo duzu non den eta zer nahi duzun. Hori da ideia», azaldu du Gartziak. «Nik esango nuke senari jarraitu behar diogula jakiteko non den. Senak esan ahal digun moduan ez dela hemen, esan ahal digu non izan daitekeen», gaineratu du Arzelusek.
«Bigarren urrats honek lasaitu gaituela uste dut, eta heldutasun puntua eman digula»
Mikel Arzelus, baxu jotzailea
Senari tiraka, soka tenkatu ordez, lasaitu egin dela aitortu dute biek. «Hasieran, tenkatuagoa zegoen. Geure buruak estuago genituen, nahi eta helburu batzuk genituelako, gauza bat aurrera ateratzeko. Bigarren urrats honek lasaitu gaitu, eta heldutasun puntua eman digu», adierazi du Arzelusek.
‘Korapiloa desegin nahian’
Soka taldea 2023an osatu bazuten ere, proiektuari forma ematen lehenago hasi zirela gogoratu du Gartziak: «Pandemia aurretik izan zen. Nire lehengusuaren bitartez, Patxi ezagutu nuen, eta harekin elkartu nintzen bertsio talde bat osatzeko. Ondo pasatzeko erromeria moduko bat. Ordea, pandemia etorri zen, eta dena pikutara joan zen».
Horrela ere, harremana mantendu, lokalean entseatzen jarraitu eta abesti propioak egiten hasi ziren. «Orduan, sareko hodeian bagenuen karpeta bat Korapiloa desegin nahian izenekoa, eta hor genituen lehen maketako abestien zirriborroak», esan du Gartziak. Abeslari eta baxu jotzaile batzuekin probatu ondoren, Arzelusekin topo egin zuten, eta berak gogoan du nola izan zen: «Plateron zerbait hartzen ari ginela egin nuen topo Beñatekin, eta baxua jotzen hasi nintzela esan nion. Hordagoa bota zidan. Haiekin entseatzen hasi, eta zituzten abestiak nirekin borobildu nahi zituztela esan zidaten».
Esan eta izan. 2024an kaleratu zuten estreinako maketa, eta zuzeneko batzuk eskaini zituzten. Aldiz, Ez da hemen lan laburra 2025eko abenduaren eta 2026ko urtarrilaren artean grabatu zuten Zestoako Gaztain estudioan, Eñaut Gaztañagarekin.
Soka taldeko kideak, lan berriaren azalean ageri den hesia eramaten.Batix Ezeiza
Erritmo biziak eta apalak
Bost abestiko lan berrian, Sokak erritmo biziak eta apalak tartekatu ditu. «Lokalean jolastu dugu, senari jarraitu diogu eta hauxe da emaitza», nabarmendu du Arzelusek. Iritzi bera du Gartziak, egun direna erakusten duelako: «Ez dugu estilo konkretu bat bilatu, jolastu eta inprobisatu dugu. Atera zaiguna da».
Musikalki, rock indartsua eta dantzagarria jorratzen dutela diote. «Hori da kontzertuak eskaini ondoren esan izan digutena. Hau da, rock indartsua jorratzen dugula, eta aldi berean, mugiarazten zaituela. Beñat Antxustegik gauza bera esan zigun lehen maketa grabatu genuenean», azaldu du Arzelusek. Horrekin batera, «emozionalak» direla uste du Gartziak: «Emozioei buruz hitz egitea gustatzen zaigu. Gauza sakonetan murgiltzen gara, baina arinkeriak baztertu gabe. Bi aldarte horiek atsegin ditugu».
«Bizitzan askotan ez dakigu zer nahi dugun eta non den. Ordea, badakigu non ez den»
Beñat Gartzia, gitarra jotzailea
Bost kantetatik, Nazka aukeratu zuten single gisa, eta bideoklip koloretsu bezain dibertigarri batekin aurkeztu zuten. «Eñaut Gaztañagak esan zigun single ona izan zitekeela, eta, hein batean, horregatik aukeratu genuen. The Clash kutsua hartzen ziola komentatu zigun», esan du Gartziak. Bideoa zinema munduan lan egiten duen Patxi Crespo taldekideak zuzendu zuela nabarmendu dute beste bi kideek. «Berak eta bere bikotekideak sekulako lana egin zuten, eta ez gaitu harritu lorturiko emaitzak», adierazi du Arzelusek. Izan ere, taldeari espero ez zuten ikusgarritasuna eman dio.
Laboaren presentzia
Lan laburreko piezetako bat Mikel Laboaren abesti ezagun baten moldaketa da. Antiguan presente dagoen musikaria da, eta orain, baita ere, Sokaren errepertorioan. Arzelusen proposamena izan zen: «Lokalera erritmo bat eraman nuen, eta buelta batzuk eman genizkion. Gero, etxean landu eta Baga Biga Higa abestiaren moldaketa izatea proposatu nien taldekideei. Gainera, bat egin zuen eskaini behar genuen hurrengo kontzertuarekin, Mikel Laboa plazaren ondoan. Han jo genuen bertsioa lehen aldiz, eta gerora grabatu genuen».
Antiguan ez ezik, Euskal Herriko beste hainbat txokotan ere aurkeztu nahi dute lan berria, taula gainean «jolasten» eta beraien abestiak jotzen jarraitu ahal izateko. Alegia, soka bera da luzatu nahi dutena.
