Reala Europa ligako zortzi talde onenetako bat da
Txuri-urdinek Fenerbahce kanporatu dute final-zortzirenetan, Turkiako itzulerako partida ere irabazita (0-2).
Realeko neskak Fenerbahceri egindako gol bat ospatzen, Istanbulen.Reala 
Bolada eta sasoi onaren bidetik jarraitzen du Realak, baita Europan ere. Merezimendu osoz sailkatu ziren atzo Europa ligako final-laurdenetara, Fenerbahce kanporatuta (0-2). Hain zuzen ere, Istanbulen (Turkia) jokaturiko final-zortzirenetako itzulerakoan ere nagusi izan ziren txuri-urdinak.
Neurketa hasi orduko bideratu zuten garaipena. Lehen minutuan, Cecilia Marcos donostiarraren erdiraketa bat bere atean sartu zuten turkiarrek. Markagailua eta joaneko errenta baliatuta, Realak kontrolpean izan zuen partida. Etxekoek berdintzeko aukerak izan zituzten, baina bikain aritu zen Arrula atezain txuri-urdinak. Gainera, lehen zatia bukatu aurretik, Keefe aurrelariak Realaren bigarren gola eta haren estreinakoa egin zuen.
Bigarren zatian, Fenerbahce pilatutako ia ezinezko galerari aurre egiten ahalegindu zen, baina alferrik. Ez zuten asmatu azken metroetan, eta baloi bat zutoinera bidali arren, ez ziren gai izan txuri-urdinei gol bakar bat ere egiteko. Horrek agerian utzi zuen Reala eraginkorragoa izan dela bi areatan, jokaturiko bi norgehiagoketan.
Final-laurdenetako arerioa Alemaniako Eintracht Frankfurt izango da. PSV kanporatu zuten atzo, eta aurkari zailagoa izango da txuri-urdinentzat. Joanekoa Alemanian jokatuko dute otsailaren 3an edo 4an, eta itzulerakoa, Zubietan, otsailaren 10ean edo 11n.
