
Bizitza erdia eman du Ana Minguezek jazz eta swing erritmora lindy hopa dantzatzen. Donosti Lindy Hop elkartea sortu zuen 2015ean, eta oso ohikoa da Jazzaldiko ikusleen artean dantzan topatzea.

Lide Hernandoren (Intxaurrondo, 1991) proiektu gisa hasi zen Liher taldea, eta ia bi urteko bira bukatzen ari dira. Euskal Herrian eta nazioartean jo ondoren, gauza berriak sortzeko geldituko dira.

Kulturari eta bereziki musikari buruz idazten duen freelance kazetaria da Jon Pagola. 2013an, hiru urteko ibilaldia izan zuen 'Kulturaldia' izeneko magazina sortu zuen. Egun, bere sinadura eta idazkera fina hedabide ugaritan topatu daitezke.

Kazetaria eta zinema kritikaria da ofizioz Begoña del Teso. Egunero pertsona bat elkarrizketatzen du, eskriman aritzen da eta, besteak beste, motoak, zezenak eta boxeoa ditu afizio.

Txirrindularitza zale porrokatua da Ander Izagirre. Euskadiko Sei Orduen kamiseta ekarri du elkarrizketara, eta behin amaituta, presaka bueltatu da etxera "Tourreko gaurko etapa oso berezia delako". Esprinterra baino gehiago, iraupen-kazetaria da bera, eta gai bakoitzari behar duen denbora eskainiz, giza balio handiko istorio paregabeak lortzeko kapaza da.