Ekialde Barrutiko Batzarrerako hauteskundeak egingo dituzte azaroaren 25ean
Altzako udaletxe zaharra da Ekialdeko Barrutiaren egoitza. (Argazkia: Beñat Parra) 
Donostiako Ekialdeko Barrutiko Batzarrerako hauteskundeak azaroaren 25ean egingo dira, udaletxean. Hautagaitzak aurkezteko epea joan den asteazkenean ireki zen, eta zerrendak bozketaren aurreko hiru egunetan egongo dira ikusgai. Azaroaren 25ean, 09:00etatik 15:00etara egongo da botoa emateko aukera.
Barrutiko batzarreko lehendakaria alkateak aukeratzen du, eta Goiak aurreratu zuen Carlos Garcia sozialista izango zela, EH Bilduk lehendakaritza berari dagokiola salatu arren —maiatzeko hauteskundeetan talde soberanista izan zen indar bozkatuena barrutian—.
Barrutien Erregelamendu Organikoaren 14. eta 15. artikuluetan aurreikusitakoaren arabera, hamar ordezkari aukeratuko dira, bost auzo elkarteei dagozkienak eta beste bost sektore erakundeei dagozkienak.
Auzo elkarte eta erakunde sektorial bakoitzak aurkeztu nahi duen ordezkariaren izenarekin batera, beste bi pertsona sartu beharko dira ordezko gisa. Idazkian argi eta garbi adierazi beharko dira auzo elkartearen edo sektoreko erakundearen izena, eta pertsona horien izen-abizenak.
Dokumentuarekin batera, auzo elkarteko edo erakunde sektorialeko idazkariak emandako ziurtagiri bat aurkeztu beharko da, dagokion barruti batzarreko hauteskundeetarako hautagaia izendatzeko organo eskudunak hartutako erabakiari buruzkoa. Era berean, hautagaiek eta ordezkoek hautagaitza onartzen dutela adierazten duen adierazpena aurkeztu beharko dute.
Hautagaitzak aurkezteko agiri horiek, Herritarren Partaidetzarako Zerbitzuak emango dituen ereduak erabiliz, udalak prestatutako edozein erregistrotan aurkeztu beharko dira. Botoa emateko eskubide materiala izango du erakunde sektorialak edo auzo-elkarteak botoa emateko izendatu duen presidenteak edo pertsonak.
Eskubide hori baliatzeko, NANa eta lehendakari karguaren ziurtagiria aurkeztu beharko dizkio hauteskunde mahaiko lehendakariari, Herritarren Partaidetzarako Zerbitzuak emandako eredua erabiliz, edo, bestela, boto eskuordetua emateko izendapenaren bidez.
Emaitzak azaroaren 27an
Bozketa epea amaitutakoan, boto zenbaketa egingo da, eta emaitzak azaroaren 27an argitaratuko dira Barrutiko Bulegoan, Altzako Alkateordetzan. Erreklamazioak aurkezteko bost eguneko epea izango da, eta Hauteskunde Mahaiak bost eguneko epean ebatzi beharko ditu.
