Iñaki Kijeraren omenezko plaka jarriko du udalak
Iñaki Kijera gazteari omenaldia Antiguan, pasa den irailean.Joseba Parron San Sebastian 
Donostiako Udalak plaka bat jarriko du larunbatean, hilaren 7an, Iñaki Kijera Zelarain gazte donostiarra omentzeko. Pasa den irailaren 1ean, 47 urte bete ziren 18 urteko antiguatarra Poliziak tiroz hil zuenetik. Gogoratu behar da aurten Kijera Espainiako Estatuaren biktima gisa aitortu duela ofizialki Espainiako Gobernuak.
Ekitaldia Parte Zaharreko Kanpandegi kalearen 1. zenbakiaren inguruan izango da, 12:00etan. Omenaldi xume bat izango dela esan du udalak, eta biktimen senideek, Jon Insausti alkateak eta udaleko alderdiko politikoetako ordezkariek parte hartuko dute.
Udalaren oharraren arabera, 1971ko irailaren 1ean, Polizia Nazionalak sakabanatu zuen manifestazio batean parte hartzen ari zen Kijera. Bere burua babesten saiatzen ari zela, Istiluen aurkako Unitateko polizia baten tiro batek jo zuen, eta eskuineko saihetsetik bizkarreraino zeharkatu zion. Hainbat minutuz ez zioten arretarik jasotzen utzi, ondoren ospitalera eramatea lortu zuten, eta bertan hil zen handik gutxira.
Duela bi legealdi, udalak terrorismoaren eta indarkeria politikoaren biktimei espazio publikoan ikusgarritasuna emateko egitasmoa abiatu zuen. Horrela, Kijeraren omenez jarriko dutena 39. plaka da.
