EH Bilduk «Insaustiren fiskalitatea hobetzeko» proposamenak aurkeztu ditu
Jabi Vitoria EH Bilduko zinegotzia, udaletxeko prentsa aretoan.EH Bildu 
Donostiako Udal Gobernuaren 2027ko tasen eta zergen proposamena aztertu du EH Bilduk: “Tamalez diogu zaharrak berri”. Esaterako, justizia sozialean aurrerapenik ez dela deitoratu dute. “Hori marra gorria da, guk aukerak sortu nahi ditugulako, gizarte justuago eta berdinzaleago bat nahi dugulako. Horrela, proposamen fiskala ez da arduratsua eta moderatua”.
Jabi Vitoria EH Bilduko zinegotziak udal gobernuaren proposamena hobetzen saiatzeko erregistratu dituzten neurriak azaldu ditu. Zehazki, hamaika arau proposamen eta bi zuzenketa dira aurkeztu dituztenak. “Kalitatezko zerbitzu publikoak eguneratzea, herritarrengandik hurbilen dagoen erakundearen bideragarritasuna bermatzea, ahalegin fiskala banatuz pertsonei lehentasuna ematea eta diru sarrera gutxien dituzten kolektiboei hobariak emanez progresibotasuna sartzea dira EH Bilduren fiskalitatearen oinarriak”, nabarmendu du.
Proposamenaren “ardura faltari” dagokionez, Vitoriak dio udal gobernuak ez duela aintzat hartu datorren urterako espero den zerga turistikoaren eragina. “Alde batera utzi da zerga honen eragina, nahiz eta, ziur asko, astebete barru onartuko den eta 2027an errealitate izango den. Eta horretarako ibili nahi al zuen alkateak korrika eta presaka? Ahalegin fiskala donostiar guztiengana bideratzeko, turistei ezarritako zerga kontuan hartu gabe? Akaso ez zuen baieztatu etxerako lanak eginak zituela?”, galdegin dio alkateari.
EH Bilduren arabera, udal gobernuak 2027an kalitatezko zerbitzuak eta konprometituta dituen inbertsioak mantentzeko beharrak kalkulatzen ditu, eman daitezkeen diru sarrerak ere aurreikusiz, batez ere FOFIM bidez. Zergak eta tasak eguneratuz lortu beharreko baliabide premia gehigarria 3,5 milioi ingurukoa dela kalkulatzen bada ere, ez ditu kontuan hartzen turismo zergaren bidez gutxienez lor ditzakeen 8 milioiak. Kopuru hori behar denaren bikoitza dela ohartarazi du EH Bilduk, eta ahalegin fiskala modu justuago batean birbanatzeko aukera ematen duela.
OHZ aldaketa
Ondasun Higiezinen gaineko Zergaren (OHZ) aldaketa ere ez dutela aurreikusi dio EH Bilduk, astebete barru Gipuzkoako Batzar Nagusietan onartuko dutena. “Horrek foru arau berri bat ekarriko du, aurrekoa indargabetuko duena, hain zuzen ere. Berme falta aipatu nahi dugu, Donostiako zerga proposamena iraungiko den arauaren baitan egin baita. Zentzu honetan ere, Insaustiren gobernuak presaz jokatu du. Egoera dela eta, udal taldeek proposamenak aurkeztu behar izan ditugu foru arau baten arabera. Foru arau hori aste bete barru indargabetuko da, eta, beraz, ez da indarrean egongo 2027rako”, kritikatu du Vitoriak.
Horren adibide dira guraso bakarreko familiak, egungo foru arauarekin OHZren ordainketan hobaririk ez dutenak, gaur egungo idazketan hobariak familia ugarietara mugatzen baitira. Hala ere, foru arau berrian sartzen dira, eta, beraz, hobaria jaso dezakete zerga hori ordaintzerakoan, betiere ahalmen ekonomikoa kontuan hartuta. Batzar Nagusietako taldeen artean transakzionatutako eta Batzordean onartutako zuzenketa da, beraz, datorren astean behin betiko onartuko da eta 2027an indarrean egongo da.
“Segurtasun juridiko eza”
EH Bilduk dio ordenantza fiskalak aldatzeko espedienteak genero eragina ebaluatzeko txostenik ez duela. “Beharrezkoa da udal ordenantzek emakumeengan eta gizonengan dituzten ondorio desberdinak aztertzea; izan ere, ikuspegi politikotik, beharrezkoa da genero ikuspegia ordenantza fiskaletan txertatzea. Ordenantza fiskalak ez dira neutroak, generoa ere badute. Ezarritako tarifek eta hobariek emakumeengan eta gizonengan duten eragina aztertu behar da, hain zuzen ere, egon litezkeen desberdintasunak identifikatzeko”, azaldu du Vitoriak.
Tasen eta zergen %2,3ko igoera orokortuaren kontra agertu da EH Bilduk. «Udal gobernuaren proposamen nagusia ezin da berriro ere Donostiako familien ahalegin fiskalean zentratu, hiri honetako bizikidetza unitateetan, aurreko urteetan bezala. Adibidez, Insaustiren proposamenak aurrera egiten badu, OHZrako legegintzaldiaren balantzea %21,44ko igoerarekin amaituko da, saneamenduaren igoera % 8,34koarekin eta zaborrarena %44,38koarekin. Donostiako zenbat etxetako ekonomiek izango dituzte beren diru sarreretan igoerak proportzio horietan? EH Bilduk ez du ulertzen nola hitz egin dezakeen Insaustiren gobernuak igoera moderatu batez”, deitoratu du Vitoriak.
Horiek horrela, tasen eta zergen ordenantza “izoztea” proposatu du udal taldeak. Era berean, aurten, arau proposamen bidez, zerbitzu horietan ordainketa ahalmenaren printzipioa kontuan har dadila berretsi dute, “funtsezkoa baita hobariak ezartzeko”.
