Kaleko afari solidarioen eta delinkuentziaren arteko «harreman zuzena» dagoela argudiatu du Insaustik
Kaleko afari solidarioen debekuaren aurrean, "alternatiba" gisa, milioi erdi euro gehiago bideratuko ditu udalak Otorduak programara, egunean "ehun otordu gehiago" eskainiz. KASek, aldiz, 300 bat afari banatzen ditu egunero.
Jon Insausti alkatea, astearte honetako Tokiko Gobernu Batzordearen osteko prentsaurrekoan.Beñat Parra 
Donostiako Udalak atzo (hilak 27) jakinarazi zien Kaleko Afari Solidarioak (KAS) boluntario taldeko kideei euren jarduna debekatzeko erabakia hartu zuela, eta horren inguruko azalpenak eman ditu Jon Insausti alkateak astearte honetako prentsaurrekoan. Esan duenez, erabaki horren ostean, “Donostiak denbora berri bat ireki du etxegabetasunari aurre egiteko”. Halaber, kaleko afari solidarioen eta delinkuentziaren arteko “harreman zuzena” dagoela esan du.
Insaustik adierazi du ez duela “zalantzan jartzen” KAS egitasmoaren oinarri solidarioa, baina gauzak “berrikusi” behar direla nabarmendu du: “Otordu batek egunean ez du bermatzen pertsonak artatzea eta jarraipen bat ematea, ezta inklusio soziala ere”. Horrela, KASen jarduna debekatzeko “lau arrazoi nagusi” daudela nabarmendu du Insaustik: gune publikoari dagokiona, osasun publikoari dagokiona, gizarte ekintzari dagokiona eta segurtasunari dagokiona.
Azken horretan jarri du fokua alkateak, nagusiki: “Egian afariak kendu zirenean, azken urte honetan, delinkuentzia tasak %20 behera egin du. Beraz, harreman zuzena badago ekimen honen eta delinkuentzia tasaren artean. Ekimen hau gauzatzen den lekuetan, Konstituzio plazan [Plaza Berria], Gipuzkoa plazan eta Anoetan, esku hartzeak bikoiztu egin dira. Beraz, bai, badago bizikidetza arazo bat. Badaude ere gune publikoari, osasunari eta baliabideei loturiko hainbat arrazoi, garbiketa eta higienea. Datu horiek guztiak hartuta, erabaki dugu ez ditugula arautuko kaleko afari hauek”.
KASek ia sei urte daramatza egunero kalean afariak banatzen, baina udalak orain erabaki du debekatzea. Horren inguruan galdetuta, alkateak esan du, alde batetik, udalak orain “txostenak eta datuak” dituelako hartu dutela erabakia. Bestetik, “aliatuak” behar dituela azaldu du: “Eusko Jaurlaritzak ateak ireki ditu baliabideak jartzeko”. Eta, azkenik, “egoera okertzen” ari zela nabarmendu du: “Bizikidetza arazoak gero eta handiagoak ziren”.
Milioi erdi bat gehiago
Kaleko afari solidarioen debekuarekin, 300 bat pertsona egunero otordu bero bat jan gabe geldituko dira. Horren aurrean, “alternatiba gisa”, Insaustik iragarri du “milioi erdi bat euro gehiago” bideratuko dituela udalak Otorduak programara. Horren bidez, alkatearen arabera, “ehun otordu gehiago” banatuko dituzte Donostian. Nabarmendu duenez, Otorduak programara 1,5 milioi euro bideratzen zituen udalak orain arte, eta 316 otordu banatzen zituzten egunean hirian. Orain, beraz, bi milioi euro bideratuko dituzte eta 416 otordu banatuko dituzte egunean.
Otorduak programa sendotzeko dirua “Eusko Jaurlaritzaren laguntzari esker” lortu dutela azaldu du Insaustik. Hala ere, “ez da nahikoa”, aitortu du alkateak: “Hasiera bat jarri behar genuen eta erroldatuta daudenei eskainiko dizkiegu ehun otordu horiek”.
Horrela, gainontzeko erakunde publikoen eta udalerrien laguntza eskatu du alkateak: “Hau ez da soilik Donostiak egin dezakeen lana”. Ildo horretatik, Gipuzkoako Foru Aldundia udalerriekin bilduko dela azaldu du, eta udaleko Gizarte Ekintzako zinegotzi Mariaje Idoeta bertan egongo dela. Horrez gain, adierazi du KAS taldeak bilera bat eskatu diola ofizialki eta haiekin bilduko dela.
“Eredu propioa”
Prentsaurrekoan, askotan errepikatu du Insaustik “eredu propioa” garatzea dela Donostiako Udalaren ildoa. Martuteneko Agustindarren eraikina hustu zutenekoa jarri du adibidetzat, La Sirena aterpetxean eman zietelako aterpe bertan bizi ziren hainbat pertsonari —aitortu du, halaber, ez zela nahikoa izan— eta horren ondoren garatu zutelako Aukerak programa.
“Orain, gauza bera egingo dugu”, azaldu du: “Humanistak izango gara, baina baita zorrotzak ere. Ordenatua eta segurua behar du izan irtenbideak, bizikidetza bermatu behar da”.
PSE-EE eta PP, alde
Insausti jeltzalearen gobernukide PSE-EEk erabakiaren inguruko balorazioa egin du, debekua “babestuz”. Insaustiren diskurtsoari jarraiki, Ane Oiarbide bozeramaileak esan du udal gobernuak hartutako erabakia “irizpide teknikoetan” oinarritzen dela, “Udaltzaingoaren, Osasun Publikoaren eta Espazio Publikoaren Erabilera Unitatearen txostenek babestuta”. “Txosten horiek agerian utzi dute jarduera hori ezin dela gaur egungo baldintzetan mantendu, segurtasun arrazoiengatik nahiz osasun araudia eta espazio publikoaren erabilerari buruzko araudia bete behar direlako”, gaineratu du Oiarbidek.
“Egoera honek zerbait eskatzen badu, da alde batera uztea konfrontazioa, eta borondateak batzea irtenbide eraginkor, gizatiar eta iraunkorrak eraikitzeko. Etxerik gabeko pertsonek erantzunak behar dituzte, ez eztabaida antzuak”, gaineratu du sozialistak. Era berean, gainontzeko udalerrien inplikazioa eskatu du berak ere.
Bestalde, PPk ere erabakiaren inguruko balorazioa egin du, baita “erabakia ospatu” ere. Hain zuzen ere, udal gobernuak erabakia “berandu” hartu duela adierazi du Borja Corominas bozeramaileak, baina PPk eskatzen zuena egin duela gaineratu du: “Segurtasuna babestu, elkarbizitza babestu eta arreta sozial duina eta ordenatua bermatu, behar dutenentzat”.
Gogoratu behar da ekaineko udalbatzarrean, PPk kaleko afari solidarioen inguruko mozio bat aurkeztu zuela. Besteak beste, udal gobernuari eskatu zioten ez onartzeko “elikagaien banaketa kolektiboko jarduerarik espazio publikoetan”. Mozioa ez zen aurrera atera, baina popularren eta udal gobernuaren jarrera salatu zuen KASek. Era berean, gogoratu behar da PPren hiru zinegotziek parte hartu zutela Lo Que No Te Cuentan De Donosti talde erreakzionarioak —udal gobernuaren erabakia txalotu du taldeak sare sozialetan— 2024an Egiako afari solidarioen aurka egindako elkarretaratze zalapartatsuan. Horren ondoren, udalak Egiako afariak debekatu zituen.
